大家細細個果陣應該都有睇過英國作家吉卜林經典文學《叢林奇譚》，就算無睇過小說版都應該有睇過由華特迪士尼製作嘅動畫電影版本，咁你地仲記唔記得故事係講咩嘅呢？

故事講述一個係印度森林中由狼群撫育嘅人類孩子—毛克利(Mowgli)。佢係大熊Baloo同豹子Bagheera嘅監護下，學識咗叢林嘅法則，並逐漸被其他動物接受，但當中就唔包括令人聞風喪膽嘅老虎Shere Khan。森林更大嘅危機仲係毛克利同人類接觸之後正式爆發……

呢個經典故事將會再次登上大銀幕，並被命名為《Mowgli》。今次嘅製作揉合咗真人、動畫、動態捕捉技術，仲會係3D版本添。電影由安迪撒克斯(Andy Serkis)執導，演員仲粒粒皆巨星添。

動物角色就包括有《蝙蝠俠》系列、《擊情手足》金像男星基斯頓比爾(Christian Bale)，《盜海豪情：8美千嬌》、《情迷藍茉莉》金像影后姬蒂白蘭芝(Cate Blanchett)，《奇異博士》、《解碼遊戲》金像影帝提名班尼狄甘巴貝治(Benedict Cumberbatch)，《末日困獸戰》、《月亮喜歡藍》金像提名女星娜奧美夏莉絲(Naomie Harris)，《猿人爭霸戰》系列安迪撒克斯(Andy Serkis)，《哈利波特－死神的聖物1》彼得穆蘭(Peter Mullan) ，《變形金剛：殲滅世紀》積雷諾(Jack Reynor)，《白雪公主之魔幻復仇記》艾迪馬森(Eddie Marsan) ，《加勒比海盜：決戰魔盜王》湯姆賀蘭德(Tom Hollander) 。人類角色方面，就有《戰雲密報》馬修懷斯(Matthew Rhys)，《猿人爭霸戰：猩凶革命》菲達萍杜(Freida Pinto)，及《米芝蓮摘星奇緣》天才童星路漢燦特(Rohan Chand)。

相信大家都見到唔少熟悉嘅名字，又或者係見到自己嘅男女神係演員名單當中。呢部電影有咁強勁嘅卡士就梗係要入場支持啦！電影由華納兄弟影片公司呈獻，並會係2018年10月18日上映，到時大家可以約埋朋友一齊重温一下童年回憶。