提起中環大家會諗起啲咩呢？係一棟棟以辦公室組成嘅高樓大廈，定係晚上異常火熱嘅蘭桂坊呢？大部分人都會諗起前面兩者。係呢兩個刻板印象之下可以憶起昔日中環面貌嘅人少之又少。既然係咁，我地就重温一下往日嘅中環啦！

「大館」指嘅係中區警署建築群由前中區警署、中央裁判司署及域多利監獄三組法定古蹟組成，一路見證本港 170 多年來嘅歷史。大館 — 古蹟及藝術館開幕展覽「大館一百面」由 5 月 29 日開幕，一直展出到 9 月 2 日。呢個展覽透過一系列嘅訪談、回憶同軼事，敘述前警務人員、釋囚、老店店主、中區街坊及學者等等與中區警署建築群之間嘅點滴故事。展覽利用咗一百個人物故事，向訪客呈現以多角度構建起嚟嘅歷史面貌，亦令佢地有機會了解中環嘅鄰里關係，以及建築群對香港嘅特殊意義。

為咗令訪客可以更加了解當時嘅情景，策展團隊仲特別揾嚟香港插畫師飛天豬參與插畫創作。飛天豬表示因為呢個合作而睇咗唔少歷史資料同書籍，加深對香港歷史嘅認識之餘，更與中環街坊建立起友誼。

展覽籌劃時長兩年，策展團隊接觸咗過百位街坊同係大館工作嘅人士，令團隊對大館嘅認識相當深刻。另外，佢地都希望藉住呢個計劃向街坊推廣歷史文化，更重要係加深佢地對中環社區嘅了解。展覽嘅設計方面，團隊由中環嘅都市風景當中取得靈感，從而創造出小城設計，等觀眾可以由大館開始重新認識中環呢個社區。展覽嘅設計伙伴一道空間創辦人及創意總監葉小卡表示設計概念係希望展現中環舊城嘅一面。佢地仲利用咗唐樓建築嘅線條，同埋唔同年代嘅中環商戶招牌，係展場營造出一個小中環，等大家可以「回到過去」。

希望大家行完開幕展覽之後可以更加了解中環同佢嘅歷史，並為腦海中嘅中環加添高樓大廈林立同夜蒲勝地以外嘅印記。