唔少人都熱愛欣賞創作，如果希望親身支持創作者，又或者係想同佢地進行交流嘅話，就千祈唔好錯過6月9日至10日於天水圍領展T Town舉辦嘅「生活藝墟」啦！ 

作為天水圍人氣地標嘅T Town透過「生活藝墟」為天水圍嘅創意藝術者提供交流平台。活動以天水圍區內藝術為主題，集結區內多個創意藝術單位同大家分享作品，以及交流心得。活動包括手藝工作坊、遊藝會和創意藝墟，務求令參與者完全沉醉係藝術嘅氣息當中。

6月9日及10日會係北翼2樓舉辦「周末創意市集」。天水圍區內不乏手作人及創作者，相信佢地會為大家帶嚟精美別緻嘅手作藝品。除此之外，活動期間嘅下午2時至6時會有免費派發嘅扭氣球、爆谷同棉花糖，為市集嘅愉快氣氛錦上添花。

除了一連兩日嘅創意市集，領展T Town亦會同創作人係6月9日於北翼2樓合辦手藝工作坊。參與創作單位包括：小物館 A Little Bigger HK、天水圍自由藝術家Grace Tsang以及手飾設計師阿Pui。今次嘅活動機會俾大家發揮創意，並親手製作小物件，例如：小清新壓花鎖匙扣、親手繪製明信片同時尚流蘇飾物。整完仲可以帶佢地返屋企添！

而6月10日領展T Town就會係南翼地下舉辦「周日遊藝會」，到時大家可以一邊支持藝術，一邊欣賞表演。除咗有星級嘉賓翟威廉嘅表演之外，大會仲特地邀請咗天水圍雜耍達人 - 潘穎樑、藍調口琴好手 - Highlanders、天水圍兒童合唱團及天水圍音樂人管樂團為大家帶來精采絕倫嘅表演，實行以藝術拉近人與人之間嘅距離。

有一系列咁吸引嘅藝術活動，大家就記住嚟緊呢個周末要空出時間去參加「生活藝墟」啦！