相信大家不時都會係地鐵站內見到導盲犬。呢啲犬隻除咗擔當視障人士嘅眼睛,亦為佢地提供精神上嘅陪伴,令視障人士可以過上獨立而有尊嚴嘅生活。當然,呢啲犬隻係成為視障人士嘅支柱之前,係需要接受唔同嘅培訓先可以勝任工作,其中真實場境實踐就係培訓中相當重要嘅一部分。
娛藝(UA)院線(以下簡稱: UA)致力為唔同社群提供欣賞電影嘅機會。為咗令更多視障人士有機會親身去戲院睇電影,UA 院線係 5 月 30 日聯同香港導盲犬協會舉辦咗首場「P 牌」導盲犬戲院體驗活動,當中邀請咗協會嘅兩位視障人士成員同佢地嘅導盲犬,還有多個導盲犬寄養家庭同受訓中嘅導盲犬,連同導盲犬導師及 UA 院線同事一齊係 UA 青衣城進行戲院實地訓練同交流。
成套訓練配合實際需要,購票、進入電影院及入座、電影放映、使用洗手間及離開電影院等細節都會包含在內,等受訓中嘅導盲犬可以體驗同適應與視障人士身處戲院環境嘅情況。今次活動仲特別邀請咗寄養家庭及視障人士分享佢地同導盲犬相處嘅點滴同心得,等戲院服務員學習如何同導盲犬相處。
UA 院線董事總經理黃嗣輝先生表示今次嘅導盲犬訓練中除咗俾導盲犬學習整個睇電影嘅流程,仲要令佢地適應長時間處於戲院嘅漆黑環境、電影放映時發出嘅聲響等。當中見到幼犬們狀態穩定之餘,仲好快就適應戲院暗黑環境。佢亦感謝協會為戲院前線同事提供與導盲犬相處相關嘅培訓工作。
黃先生仲希望呢個體驗計劃可以為導盲犬培訓打下基礎,令受訓犬有機會去到唔同環境或設施適應,以及獲得更多同人相處實習嘅機會,令佢地更容易融入社會。同時亦想增加大眾對導盲犬及視障人士嘅認知。佢表示UA會繼續同協會緊密合作,期望日後可以繼續舉辦戲院體驗活動,並持續推廣導盲犬培訓工作。
而香港導盲犬協會委員/發展委員會主席遲淡寧就表示受訓中嘅導盲犬因為未受到香港法例嘅全面保障,而導致佢地出入公共場所時容易遇到阻滯,因此佢好感謝 UA 院線主動提出舉行體驗活動去推廣導盲犬服務,令訓練中嘅導盲犬可以適應戲院環境同學習場境所需嘅禮儀。
導盲犬嘅工作好需要社會大眾嘅支持鼓勵先得以持續進行,令更多嘅視障人士得到幫助。無論係街上見到受訓中定工作中嘅導盲犬,記住要保持包容同接納嘅態度,但就唔好撩佢地玩呀!