各位愛玩愛食嘅女士相信都有出開旺角，最近朗豪坊有多間新店舖進駐，包括集創意、傳統同色香味於一身嘅新派燒味餐廳Oh My Goose!、全港首創「當店精米」壽司同埋食店丸十寿司 日本食堂，以及充滿越南風情嘅火車頭越南餐室。

食飽之後，又點少得行街幫助消化呢？當中最矚目嘅就一定係全港首間主題智能零售體驗店TapTabLand、Giveco氹人專門店以及天然個人護理品牌SUPËRSNATURAL。今個暑假，大家同閨蜜們又多咗個聚會好去處啦！

Oh My Goose!

4樓美食廣場
T: 2110 3998

叉燒、燒鵝呢啲都係大家最熟悉嘅味道，仲會帶嚟新驚喜咩？ Oh My Goose! 就相信創意能為傳統美食帶嚟新鮮感！

店舖集合咗對燒味嘅回憶，以及多年嚟嘗遍各地燒味嘅經驗，再加上對色香味嘅追求，終於落戶朗豪坊美食廣場，等大家可以用平民價錢享受頂級美味！

店舖不但用咗傳統燒味秘方，仲加入新派食材製法，令其擦出火花。加上師傅豐富嘅經驗，就可以做到鮮而不俗、嫩而不生、脆而不焦、肥而不膩、香而不厭嘅效果啦！

丸十寿司 日本食堂

12樓13號舖
T: 3188 0978

丸十寿司 日本食堂秉持日本人對味道嘅追求，首創「當店精米」：「精米」指嘅係將米糠由粗硬嘅玄米表面輾走，再打磨成口感軟熟嘅白米呢個工序。

為咗向顧客提供最新鮮嘅白米，廚師每天會將玄米放入由日本進口嘅精米機器入面，進行唔同程度嘅精製，為美食注入濃郁米香同滿滿嘅健康，並將「精米」，處理白米嘅最後一道工序，移到餐廳入面進行，確保你地食到嘅每一啖壽司都美味可口！

店舖仲會按照季節氣候挑選米品種使用，當中精選四款上佳嘅日本米，務求為你地奉上最適時美味嘅米飯食品。

火車頭越南餐室 

4樓12號舖
T: 2981 6880

火車頭越南餐室一直保留越南傳統牛肉菜式嘅味道香氣。其中他們嘅「火車頭」牛肉粉可以話係為大家精心炮製。

湯底以牛骨、花椒、南薑、洋蔥等十多種材料，熬最少十個鐘而成。熱湯瀉下，淋上進口鮮嫩薄切嘅生牛肉片，牛肉轉色即熟，真係令人食指大動。

愛食但又想保持身型嘅女士們要記得蘸啲魚露呀。據說越南姑娘嘅身型如斯苗條，都係因為咁做咋。

TapTabLand 

10樓06號舖
T: 6273 2251

TapTabLand係全港首間採用智能售賣機嘅零售店，店內有唔同嘅精品主題機。同傳統售賣機唔同，佢唔單只係得汽水零食咁簡單！

呢間「無人商店」有多款唔同主題嘅智能售賣機，等客人感受全新嘅零售體驗。店舖內有兩部「佛系緣份心情購物機」，會因應你嘅心情同緣份，跌出相應產品。真係緣份一到，自然會買到。

另外，店內仲有玩遊戲贏護膚品嘅智能零售機，而店外面仲有唔同嘅打卡位同櫻花樹，等大家瘋狂自拍！

Giveco氹人專門店

10樓13-15號舖
T: 2568 8680

作為氹人嘅專門店，Giveco為情侶們設計咗多款簡單嘅自訂禮物方案：你只需要輸入自己同另一半嘅文字或紀念日，就可以製成你地專屬嘅情侶裝！

Giveco嘅自訂情侶產品包含情侶T-shirt同埋手機殼，每款都是由Giveco設計師構思同設計，務求可以整出情侶間最甜蜜嘅禮物！自訂情侶裝有幾個唔同嘅主題：新娘新郎款、夫妻款、拍拖款、療癒狗狗款及求婚款等等，不論係拍拖去旅行拍照、甚至拍攝pre-wedding婚照果陣都一樣咁適合。

6月15日至17日將會舉行新店開幕特別活動，讚好Giveco嘅facebook可獲贈特別設計嘅糖果，消費滿HK$100仲會獲贈禮品。

SUPËRSNATURAL

2樓02號舖
T: 2529 3688

大自然擁有強大能量，泥土更係為大家孕育豐富嘅療癒元素。SUPËRSNATURAL呢間beauty select store精心挑選出古今中外、歐美各地嘅個人護理產品。

佢地款款都充滿大自然文化智慧，發揮最大嘅泥土力量，為今日嘅Digital Life 時代打造延年益壽、賞心悅目嘅優質生活。
 

有咁多新店舖開張，女士們可以約埋三五知己落朗豪坊，一齊吃喝玩樂，等自己可以放鬆一下。