對於我地嚟講睇電影只係一件好平常嘅事，唔少人成日都會約親友一齊去睇電影，但係聽障人士就難以享受電影嘅樂趣。有見及此，UA 院線夥拍香港聾人福利促進會（聾福會）舉辦咗「看出共融．關愛共賞」首個聽障無障礙電影欣賞會。
 

聽障人士喺一般社交活動，或者參與唔同文化及娛樂活動等都面對不少難題。由於社會配套不足，聽障人士未能隨心所欲參與自己喜愛嘅活動。過往聽障人士單靠自己嘅助聽器觀賞電影，容易遇上音效問題。在放映時又未必方便以手語溝通，亦令他們好少同健聽嘅家人朋友同場同步睇戲。

有見及此，UA 院線喺五月上旬於 UA 青衣城（House 2）及 UA Cine Times（House 2）增設視障人士及聽障人士觀影輔助設施，為配帶已啟動「T」掣助聽器嘅觀眾提供聽力支授服務，有效放大同集中電影原有聲道， 令聽障人士更投入電影之中。 

喺 6 月 30 日，一眾聽障人士齊集 UA 青衣城配戴輔助設施欣賞電影「黃金花」。一眾用家都表示使用輔助設施看戲，令電影聲效更集中、有效減低雜音。聾福會亦於活動中分享同聽障人士溝通嘅簡單方法及常用手語，等戲院服務員亦可以藉住呢個活動學習點樣向聽障人士提供適當協助。

 UA 院線董事總經理黃嗣輝先生表示好開心看見各位聽障朋友對輔助設施感到滿意。佢地會積極計劃喺更多合適嘅戲院加入輔助設施，讓更多聽障人士可以與家人朋友一同去戲院看戲。佢亦期望社會各界積極參與支持不同社群所需，不斷推進同完善各項無障礙服務。 

聾福會總幹事黃何潔玉女士指出與健聽人士一樣，社區及娛樂活動對聽障人士嘅身心發展都好重要。觀影輔助設施令聽障人士得以無障礙地享用觀賞電影，同時亦有助增加與健聽人士之間的話題，促進聾健共融。 

聾福會高級聽覺學家黃建威先生補充，一般使用嘅助聽儀器只要加上簡單嘅配套設備，就可以提供另一種接收方法，令收聽效果更佳。UA 院線新增設嘅觀影輔助設施有效將聲音轉換成磁場能量，有助助聽器上嘅「T」掣接收電影聲音信號。「T」掣仲可以用於接受廣播、電話或電視聲音等。 

觀影輔助設施令聽障人士可以集中聽到電影原聲去感受氣氛，亦更容易理解電影內容。喺娛樂場地提供無障礙服務可以鼓勵聽障人士參與社交活動，為佢地提供更多娛樂選擇之餘，仲能夠推動共融。UA 院線呢次活動可謂意義重大。