嚟到夏天，大家諗好去邊玩未呢？成日留喺都市，不如去親近大自然，睇下自然奇觀，轉換下心情啦！當然，天氣咁熱就唔少得要去玩水啦。有咩地方可以滿足哂呢啲嘅願望？

今次要介紹俾大家嘅就係台灣綠島啦！綠島位於位於台東市東方約33公里嘅海面上。佢係一個由火山集塊岩所構成嘅島嶼，當地嘅水下生態非常豐富，並且有一個曲折多變嘅海岸景觀。

其中一個唔可以錯過嘅景觀就係奇岩異石啦！當地因為受到海水嘅蝕食同風化作用而形成咗各個奇特嘅岩石，當中包括「哈巴狗與睡美人岩」、「火雞岩」、「將軍岩」、「牛頭山」同「孔子岩」。每一個都係大自然嘅鬼斧神工之作呀！

綠島仲係一個潛水嘅好地方嚟咖，當地海中地形變化大，並有大量珊瑚礁岩，吸引不同嘅魚群居住。即使未接觸過潛水亦可以試下潛水體驗，一探海底瑰麗世界。相信海中美景會令你驚嘆不已。

當地仲有個非常有罕有嘅海底温泉，由於温泉面向日出方向，因而被稱為「朝日溫泉」。水源自附近海域嘅海水或地下水。佢地滲入地底後，經火山岩漿庫加熱從潮間帶露出而形成温泉。玩完一日再浸温泉真係完美呀。夜晚抬頭仲可以見到滿天星添！

難得去到大自然，就當然係想有機會可以睇下動物啦。你亦可以放心，呢個地方絕對唔會令你失望！夜探梅花鹿係一個相當熱門嘅活動。當地係野生梅花鹿嘅棲息地，由於佢地怕生，以日間就較難發現佢地嘅蹤影。到夜晚就可以靠鹿眼反射嘅光線去發現佢地。

野生梅花鹿都需要有一定運氣先見到咖。如果唔想玩運氣考驗嘅話，亦可以去到位在公館村的梅花鹿生態園區同佢地近距離接觸，體驗餵奶同餵牧草。呢個亦係唔錯嘅選擇呀！

相信大家對都市生活習以為常。去旅行果陣不妨揀返啲郊野地方，為生活帶嚟清新感覺。如果想過一個充滿大自然氣息嘅夏天嘅話，台灣綠島就一定可以滿足到你！