熱愛睇韓劇嘅大家相信都不約而同地忙住追《金秘書為何那樣》，當然好睇嘅劇集一浪接一浪，嚟緊七月又有必追嘅韓劇推出啦！
 
Netflix 宣佈，由李炳憲、金泰梨主演嘅《陽光先生》（Mr. Sunshine）將會喺 7 月 7 日於美國、香港、台灣及亞洲多數地區與韓國同日首播（日本將於 7 月 8 日首映，而其他地區將於 7 月 19 日起陸續加入）。
 
呢部全新韓國劇集係由多部大勢韓劇嘅黃金編導團隊金銀淑「金編」與李應福導演再度聯手推出嘅古裝劇集，全劇共24集。編劇金銀淑與導演李應福先前作品屢創佳績，兩人攜手打造嘅《太陽的後裔》及《鬼怪 — 孤單又燦爛的神》於國際間均大獲好評。
 
今次推出嘅《陽光先生》由韓國頂尖戲劇公司 Hwa&Dam Pictures 及 Studio Dragon 製作，同由雙方合作炮製嘅作品包括《鬼怪 — 孤單又燦爛的神》及《Bravo My Life》。呢個完美組合到底會再次刷出啲咩火花呢？真係令人好期待呀！
 
《陽光先生》係以 19 世紀後半嘅辛未洋擾時期為時間軸，講述一名出身僕人家庭嘅朝鮮男孩離開祖國，登上美國軍艦，多年後以美國軍官身分重返故鄉，卻愛上朝鮮貴族世家女兒，仲發現要殖民朝鮮嘅陰謀。
 
喺本劇擔當男主角的李炳憲曾參與多部國際影視作品，今次就會喺《陽光先生》飾演韓裔美國軍官崔宥鎮；而飾演女主角貴族小姐高愛信嘅演員，就係以《下女誘罪》而名聲大噪嘅金泰梨。同劇其他演員包括柳演錫、金玟廷、卞約漢等。
 
Netflix 內容採購副總裁（Vice President of Content Acquisition）Rob Roy 表示韓國流行文化近年來席捲全球，佢地致力帶嚟更多高質嘅韓國劇作。今次能夠成功引入像《陽光先生》如此出色嘅劇集，可以令Netflix更進一步，繼續為全球會員提供更精彩嘅韓國節目。
 
有新劇陪住，呢個夏日大家又可以過得更加愉快啦！