夏天吹住海風睇海真係人生一大樂事，不過呢一次就想同大家跳出香港，一齊去到台灣睇海。相信大家對台灣花蓮都唔會感到陌生，當地因為有着各種怡人美景而聞名。今次就介紹當地一個名為石梯坪嘅好地方俾大家啦！

石梯坪位於花蓮縣豐濱鄉石梯灣嘅南側尾端，果度嘅海蝕地形非常發達，海蝕平台、珊瑚礁、海蝕溝、海蝕崖等隨處都可以見到，其中壺穴景觀更堪稱台灣第一。喜愛觀賞自然之美嘅你就絕對唔可以錯過呢個地方啦！

當地除咗擁有令人為之迷醉嘅自然景觀外，更係擁有豐富嘅生態資源。石梯坪海岸不但有豐富嘅珊瑚礁群和熱帶魚群，其中潮間帶上與壺穴形成嘅潮池，更係各種海藻、魚蝦、貝類等嘅棲息地。

得天獨厚嘅條件令石梯坪成為觀察生態同潛水嘅絕佳場所，美麗嘅地貌就當然可以沿住環狀步道細看。假如你希望將美景盡收眼簾，就可以登上單面山，不但看盡地質景觀，更可以欣賞到壯麗嘅太平洋。

如斯美景難免會令人依依不捨，未夠盡興亦唔洗擔心。石梯坪設有營地，等你可以喺當地露營。温柔嘅月色映照住近在咫尺嘅太平洋，你可以聽住海浪聲觀星，緩緩入睡。早上起身更係可以觀賞到日出，無論係朝早定夜晚都可以睇到令人屏息嘅景觀。

呢種人人都嚮住嘅生活就當然係要親身去體驗啦。今個夏天就盡情咁投入大自然嘅擁抱啦！