美心中菜粵菜團隊又為食客帶嚟驚喜、美味兼備嘅新粵菜體驗啦！今個夏日，美心中菜首度將正宗星馬味道帶到旗下粵菜食府網絡，推出「嚐味星洲」系列，並誠邀新加坡資深名廚擔任客席大廚，向粵菜大廚團隊親授炮製南洋菜餚嘅獨門秘訣，揉合美心中菜大廚嘅粵式巧手，一定會為大家展現別具一格嘅星洲菜餚韻味。

為炮製「嚐味星洲」系列，美心中菜特別邀請客席大廚張偉忠師傅從獅城遠道赴港。現為新加坡中廚協會會長嘅張師傅係星洲首屈一指嘅名廚，佢曾任職新加坡歷史悠久嘅「長堤海鮮樓」20多年。該店所創製嘅辣椒蟹、黑椒蟹獲奉為新加坡國菜，而張師傅亦秉承咗兩道國菜嘅烹調精髓，烹蟹功夫可謂名門正宗。

此外，本系列亦獲美心中菜助理總廚黃漢強師傅強勢坐鎮，憑著20多年嘅掌杓經驗以及對粵菜烹調嘅精闢見解，與張師傅各展其長，帶領客人踏上星粵交融嘅味覺之旅。

新加坡憑其優越港口位置接通四海，各族群間嘅飲食文化互相影響，喺呢片土地上綻放異彩。「嚐味星洲」嘅菜式就捕捉咗星洲菜嘅多元特質，而今次嘅主打菜式就係獅城甘香蟹啦！當然仲會有多款星馬名菜任你挑選。

獅城甘香蟹

呢道甘香蟹係星馬名菜，團隊選用咗咗以巨型、肉質彈牙見稱菲律賓大肉蟹去炮製呢道菜，啲蟹鉗真係極大舊呀！當中用到嘅甘香醬以唔同海味同香料混合而成，包括咖喱葉、炸蝦米、蝦膏同各種香料，微辣中帶誘人芳香，惹味濃郁。配埋大肉蟹就令菜式鮮、香、辣俱備，令人食指大動。

新加坡麥皮蝦

所謂「金絲」，係將蛋汁以慢火快炒成細絲狀，所以呢道菜好考大廚嘅火候功夫咖！將金絲、麥皮、牛油同埋原隻大蝦同炒，香脆惹味老少皆宜。 

星洲海南雞

講到新加坡最具代表性嘅美食就一定係海南雞啦。雞肉新鮮嫩滑，配上特製酸辣醬、甜醬油及以紫薑製成嘅薑蓉，香口惹味。唔好睇雞飯粒外表好普通咁，其實佢係用珍珠米加上雞湯煲成，入面仲加入咗香茅及蒜粒，軟綿入味。飯粒揉成乒乓球狀作伴碟，為成道菜加添玩味感覺。

亞參咖哩龍躉球

中國人一般稱「亞參」為羅望子，因為佢味道帶酸，特別醒胃，所以星馬人好鐘意將佢混入咖哩醬用嚟煮海鮮。呢道「咖哩龍躉球」亦特別選用馬來產嘅亞參咖哩汁，將龍躉起肉烹煮至結實入味，而菜式內嘅茄子及秋葵亦吸收哂咖哩嘅味道。成道菜式酸中帶辣，勾起人嘅食慾。

鴛鴦蒜黑豚肉骨茶

呢道菜係將胡椒原粒炒香打碎，再加入新鮮豬骨與香料同煲數小時而成。佢唔單只清甜香濃，仲會散發陣陣胡椒香。喺材料方面，大廚特意選用黑豚肉，佢嘅肉質嫩滑軟稔，仲吸盡肉湯精華，令人回味無窮！

肉鬆黃金脆魚皮

鬆身脆口嘅鮮炸魚皮上面沾滿咗咁香惹味嘅咸蛋碎，仲有層層肉鬆喺上面。呢道菜式既香口又唔膩，令你忍唔住一塊緊接一塊咁放落口，無論係大人定係小朋友都會食到停唔到！

地道檳城蝦麵

原祖福建嘅檳城蝦麵係馬來西亞嘅代表美食，爽滑嘅麵條，濃郁嘅湯底，新鮮嘅大蝦，組成色彩斑斕嘅配搭，望見賣相都已經食指大動。大廚特別喺湯底花咗好多心思，先係以蝦米、紫薑及各種香料炒成蝦醬，再混合經長時間熬製嘅蝦湯，真係滋味無比。食嘅時候一定要細味呢個湯底呀！ 

老巴剎肉脞麵
肉脞麵 (Bak Chor Mee) 係潮州話，意思係肉碎麵，據講係由早期移民自中國嘅潮州人帶入南洋。細麵與少許醋及溫純嘅湯拌勻，再加入鮮甜嘅肉碎、豬肚、豬膶、魚蛋等多種材料，入口甘香，口感豐富。

斑蘭椰汁糕

充滿星洲風味嘅斑蘭葉，為濃郁嘅椰漿同埋軟滑糯米增添一份芳香。食嘅時候會散發出陣陣椰香，仲可以食到有咬勁嘅糯米。呢道甜品格外清甜怡人，夏天食就啱哂啦。

榴槤凍布甸

「果王」榴槤屬貴價水果，而馬來西亞盛產嘅「貓山王」更是當中王者。呢道凍布甸正正係以「貓山王」榴槤製成，只係放喺枱上都可以聞到陣陣濃郁果香。布甸香滑鮮甜，而且每一啖都可以食到濃厚嘅榴槤果肉，可以話同食榴槤並無二致。如果你喜愛榴槤嘅話就不容錯過呢款甜品啦！

「嚐味星洲」系列
推廣日期：2018年7月16日 至 9月14日
推廣分店：全綫美心皇宮、全綫翠園(尖沙咀、美心‧翠園除外)、翠韻軒、海逸軒、怡翠軒、八月居、八月花、八月軒、全綫八月
@ 另收茶位費、前菜費及以原價計算之加一服務費 
# 優惠須受條款細則約束。個別食品及其售價適用於指定分店，詳情請向店員查詢。