唔少人都會被夕陽美景迷倒，不斷去發掘觀賞日落嘅最佳地方。今日就推介一個被外國網站評選為「此生必遊絕景」嘅地方俾大家，等你地可以趁呢個暑假飛到當地走一轉。

位於台中清水大甲溪出海口南側嘅高美濕地具有極高生態價值，其面積廣達1,500公頃。當地擁有相當豐富嘅天然資源，更加係台灣境內少數幾處雁鴨集體繁殖區之一。 多達120餘種鳥類曾經喺呢個濕地棲息，所以高美濕地係一個相當重要嘅生態保育區。佢亦逐漸取代大肚溪口，成為賞鳥者必到嘅地方。

高美濕地具有泥質及沙質兩種灘地，更連接河口沼澤地帶。而當地嘅雲林莞草區就形成乾濕相間，且伴有植物生長嘅複雜地形。因為有着多變嘅地形同地理條件，高美濕地孕育出複雜嘅濕地生態，主要為鳥類、魚類、蟹類及其他無脊椎類生物。

遊客可以踏上設置喺野生動物保護區嘅核心區與緩衝區嘅木棧道上觀賞當地生態，台中市農業局指木棧道打造為「生態廊道」，當中體現「把遊客留在木棧道上，把濕地留給潮間帶生物」嘅保育理念，希望遊客喺觀賞同時唔會打擾生態。

到咗落日時分，遊客就可以沉浸喺夕陽西下嘅景色當中啦！下沉嘅太陽與水面相交，令天空與地面嘅交界變得模糊。再加上西側海岸嘅風力發電機組作背景襯托，必定會令你影到心目中嘅理想夕陽。

大家記住去嘅時候要遵從指示，唔好私自落到濕地步行呀。去之前亦可以留意一下潮汐表，以免去到嘅時候木棧道被封閉，而專程去睇夕陽嘅旅客就可以先到網站查一查日落時間，咁就唔會錯過呢個美景啦！