暑假嘅到來代表旅遊旺季嘅開始，平日返工放工都已經同人逼得多，去旅行就梗係揀返啲與世隔絕嘅地方，好好咁放鬆一下。既然想避開人多嘅地方，咁就當然唔會揀大路嘅台灣，日本同韓國。呢次就去東南亞旅遊啦！

今次要推介俾大家嘅係位於柬埔寨嘅頌薩島，係呢度你可以欣賞到柬埔寨海岸嘅美麗景色，遠離都市生活。呢個咁美妙嘅渡假島係由一對嚟自澳洲嘅夫婦Rory & Melita 歷時7年精心打造而成。Rory主要負責小島嘅環境保護同管理，而身為一位室內設計師嘅太太Melita就負責規劃同設計。

因為兩人希望喺島上體現可持續發展理念，並保留島上嘅特色面貌，所以設計上就別具心思。佢地利用本土材料建造木製別墅，並採用循環再造嘅裝飾及再利用家具，貫徹環保理念。廢棄油桶被打造成精緻嘅檯燈，桌椅就係用枯木製成，由舊漁船同工廠碼頭蒐集嘅木材就變身為露台、地板和橫樑，可見每一寸都係充滿巧思。

別墅體現出柬埔寨典型嘅建築風格，別緻嘅茅草屋頂同亞麻垂幔公主床令其充滿自然氣息，而開揚嘅設計更係令身處喺室內嘅你可以同大自然保持零距離，時刻感受自然之美。

島上有各種各樣嘅活動可以俾你選擇，無論你想深入海底探索瑰麗嘅珊瑚礁群，抑或係爬到高處欣賞美景，呢度都可以滿足到你。

夜幕低垂時，你仲可以喺繁星之下，安坐喺沙灘享受晚餐，真係好浪漫呀！想嚟一場避世旅行嘅你，就絕對唔可以錯過頌薩島呢個上佳嘅選擇啦。

頌薩私人島嶼酒店: 

https://www.songsaa.com/zh-cn/home