夏天嘅時候，只係啱啱踏出大廈，啲陽光就會不留情面咁照射喺你嘅身上面。要保護肌膚，就當然係要揀返啱自己嘅防曬產品用啦！但防曬產品有咁多種，又應該點樣揀呢？
我地平時用開嘅防曬液其實可以被分為兩種，分別係化學性防曬，以及物理性防曬。
化學性防曬利用化學成份去為我地吸收紫外光，中和同減輕紫外線對皮膚嘅傷害。平時女士們用開嘅防曬化妝品就係加入咗呢種化學成份去保護你地嘅肌膚咖啦！呢款防曬係需要約二十分鐘先可以發揮佢嘅功效，所以要喺比出門時間提前塗抺，等佢可以喺你踏上街道時立即有效。
而物理性防曬就係將嚟自天然礦物嘅「光粒子」塗喺皮膚上，從而形成薄膜，達到折射及阻隔紫外線嘅作用。由於化學性防曬液有可能刺激皮膚，引致過敏，敏感皮膚人仕就較適合選用溫和不刺激嘅物理性防曬啦。
兩種防曬喺質感上亦有分別，通常物理性防曬需要較油嘅配方令顆粒分佈平均，所以塗上感覺比較油膩，另外白色粉末亦可能引致流白汗嘅情形。而化學性防曬劑就較為清爽，唔會有油膩感。
咁平時提到嘅SPF同埋PA又係啲咩嚟嘅呢？
紫外線可分為UVA同UVB，UVB會導致曬紅、曬傷，長期照射會造成皮膚老化。而UVA就會令人曬黑，高穿透力令佢可以穿透玻璃、塑膠等到達室內。佢波長較長，能夠穿透至較深嘅真皮層，導致皮膚老化、皺紋、長斑，甚至皮膚癌。
SPF（Sun Protection Factor）係用作防UVB嘅指標，數字愈高就代表愈能防止曬紅曬傷。而PA（Protection Factor of UVA）就係用作防UVA嘅讀數。PA值被劃分為PA+、PA++、PA+++、PA++++四種不同程度的+，+號越多表示對UVA防護能力及防曬黑能力越高，可以防止黑斑形成。
雖然係咁，但並唔代表次次都要用最高數值嘅防曬產品，有時候SPF數值高可能代表住當中加入咗添加劑，反而對皮膚造成損害。所以喺選擇產品嘅時候，要睇返自己嘅需要及使用場合，用作戶外活動就可以選擇返較高度數嘅防曬用品，記住防曬重點在於按時補塗，除曬液會因出汗而被帶離皮膚，度數再高都係無用咖。
最重要嘅係要睇下產品啱唔啱自己嘅膚質使用，一有不適感就應該立即停用啦！
