唔少女士為咗減磅，會進行按各種節食餐單進食，又持續做運動，但有無發現無論你點努力，成果都唔係好顯着，體重甚至有上升嘅趨勢呢？咁好可能係因為你忽略咗睡眠嘅重要性啦！

都市人生活繁忙，好多時要捱夜工作，再唔係就因為心魔作怪，沉迷玩電話，拖到瞓教時間越嚟越夜，第二朝又要起身返工，咁就當然係會睡眠不足啦。

瑞典烏普拉薩大學嘅班尼狄克博士發表嘅臨床研究指出，睡眠不足會降低新陳代謝率，仲會降低20％體內能量嘅消耗率，所以長期睡眠不足，係會令人發胖咖。

研究結果發現，睡眠不足會減少身體能量嘅消耗，令新陳代謝率下降。另外，內分泌亦會受睡眠時數影響。令人感到飢餓嘅飢餓素會喺睡眠不足時上升，而壓抑食慾嘅瘦體素就會下降，令身體合成更多脂肪，搞到你食得多又代謝得慢，長期下來變肥就係必然嘅事啦。

同睡眠充足者相比，缺乏睡眠者喺日頭偏好選擇高熱量、高脂肪、高蛋白食物。女性缺乏睡眠時會比平時一天多攝入329 卡路里，所以瞓得唔夠真係易發福咖。

想瘦唔單只要做運動同控制飲食，仲要配合埋睡眠先可以成事。千祈唔好睇少一兩個鐘嘅差距呀，減肥成敗就係睇呢度啦！所以要記住保持良好嘅作息習慣，確保自己每一日都可以睡足七個鐘，第二日精神之餘仲有助實行減肥大計添呀。