無論係學生定係上班族，喺平日生活中都總會面對各種大小問題，學業及事業都會帶嚟唔同程度嘅壓力。當然，適量嘅壓力轉化為推動力，但過量嘅壓力就會令你嘅生活質素受到影響，其中失眠就係其中一個壓力引致嘅常見問題啦。

當第二日有個重要嘅會議或者考試嘅時候，好多人都會緊張到瞓唔到，睡眠不足就當然會影響精神，進而令表現大打折扣啦。長期失眠就更係會令人情緒暴躁，皮膚變差之餘仲會因為內分秘失調而引致肥胖，所以失眠呢個問題真係要盡早解決先得呀！

今日就同大家分享一個號稱可以令人喺一分鐘入睡嘅呼吸法，等你地可以秒速入睡啦！根據「日刊SPA！」報導，「478呼吸法」係一種有意識地利用呼吸，調整自律神經嘅方法，佢嘅
做法非常簡單，只要做以下3步驟，並以此為一循環，總共做4次就可以啦。

Step1：慢慢用鼻子呼吸，再默數4秒。
Step2：憋氣7秒。
Step3：由嘴巴吐出全部空氣，並默數8秒。

透過長達4秒嘅呼吸，能夠吸進更多嘅氧氣，緊接憋氣7秒，就令氧氣可以更徹底地進入血液，最後透過吐氣8秒減緩心跳，俾肺部排出二氧化碳。呢種呼吸法可降低交感神經嘅興奮程度，令你嘅身體進入放鬆狀態，咁就可以輕鬆入眠啦。

當然，想改善睡眠就梗係唔可以單靠呼吸法。保持良好嘅習慣先可以令呼吸法發揮到最大作用，包括維持定時嘅作息時間、避免攝取過多咖啡因、睡前唔好使用電子產品，呢啲都係對改善眠品質相當重要咖！