無論係電影定係劇集,總係會見到荷里活嘅超模及明星們除咗必備嘅標緻外貌外,仲擁有完美嘅體態。想練成呢副曼妙身材,除咗要定時運動之外,呢一眾明星都有實行「ABCDEF減肥法」,到底係咩嚟咖呢?
「ABCDEF減肥法」係由明星健身教練David Kirsch規劃出嚟,當中字母分別代表六種只要戒食就可以令你瘦落嚟嘅食物。
A(Alcohol)係酒精,即係唔可以飲酒;B(Bread)係麵包,C(Carbohydrate)就係碳水化合物,代表禁食麵飯類食品;D(Dairy)係乳製品,代表禁食牛奶、芝士;E(Extra sweets)就代表女士最愛嘅甜食,代表禁食糖果及蛋糕;F(Fruit and Fats)代表禁食高糖份嘅水果同埋含有大量脂肪嘅肥肉。
呢種減肥法係以吸收高蛋白質及低碳水化合物為目標,一齊嚟睇下教練嘅推薦菜單啦。
ABCDEF減肥法一日菜單
早餐: 以蛋白製成奄列或雞蛋炒蘑菇
午餐: 蘆筍烤鮭魚、蒸雞胸肉加花椰菜或水煮菠菜加雞肉
點心: 鮪魚沙拉(使用低脂調味醬)
晚餐: 煎鮭魚排加菠菜炒香菇或牛肉烤甜椒
唔好以為戒口就可以得到完美身材,呢個減肥法仲要配合運動。喺減肥期間係需要每日都做一個鐘嘅運動,其中45分鐘都要係有氧運動,包括15分鐘肌力訓練,游水、踩單車等。
不過「ABCDEF減肥法」只可以令你兩週內快速瘦落嚟,破戒就會有復胖風險,要避免復胖就要跟隨三階段嘅飲食法。
第一階段 :「ABCDEF減肥法」只能維持2星期,每日熱量必須控制喺800至1000大卡。
第二階段 : 完成第一階段就可以加入少許碳水化合物,比如馬鈴薯、糙米、燕麥粥等,維持血糖喺平穩狀態,並降低飢餓感,每日熱量要控制喺900至1100大卡。
第三階段 : 嚟到呢步就係終身型飲食方式,需要維持高蛋白、低碳水化合物飲食,但有陣時可以俾自己放縱大食。