小編成日都同大家介紹深圳適合打卡嘅Cafe、餐廳，比大家同好姐妹去影個夠，但有時同男生們一齊返去玩，係甘去粉紅夢幻嘅打卡點就會唔太合適啦，所以今次小編就同大家介紹呢間好食又貼地嘅火鍋，同男仔返去玩可以開開心心食飯啦！

食途係一間專食牛腩牛雜邊爐嘅餐廳，裝修有少少復古嘅味道，牆身上有黃紅綠霓虹燈，都幾搞笑，店主係設計上好有創意呢。

大家可以依自己喜好揀牛雜煲、牛腩煲或者雙併；湯底可以揀原味、孜然、香辣或者蕃茄，分小、中、大三個分量；又或者點套餐，食唔同嘅人數套餐名都好搞笑。2個人係我和你；3個人係伴我左右；5個人係好久不見，咁就唔洗自己煩惱要咩配菜啦！

今次我地就叫咗我和你2人套餐，其實份量都幾多，我地揀咗番茄湯底雙拼鍋，紅卜卜嘅湯底勁吸引啊! 番茄湯底好香甜，感覺上無落味精。不過最好就煮耐少少先食，一黎湯底會更濃，二黎上檯嘅時候牛腩牛雜係未入味，要煮耐D先更好食。

牛腩牛雜唔算非常多，但好好食，煮得非常軟稔又唔會散，同蕃茄湯底搭配會有西湯嘅味道。二人餐入面嘅配菜有牛肚、娃娃菜、秀珍、炸腐竹同白飯，2個人食其實真係飽有突。

醬料係要自己出去拎，正正常常，唔算太多搭配。

套餐係唔包飲品，大家唔想想飲水要自己另外點，小編點咗招牌水果茶，但其實真係唔太出色，而且旁邊其實有喜茶，寧願之後飲喜茶會更開心。

食途·明火砂鍋牛腩煲（中心城店）

地址：福華一路怡景中心城負2層FG009號商舖（喜茶隔壁）

電話：0755-23944336