「無疾而終」一詞，可能令人第一時間諗起男女之間嘅愛情，但其實呢個詞語亦都適用於朋友之間嘅友情。唔少人都曾經有咁樣嘅經歷：與一個人成為密友，但唔知咩時候開始，你地變得唔再合拍，甚至形同陌路......

人生中總有機會要與好友分道揚鑣，但又有幾多人可以將呢個分別做得好睇呢？相信唔少人喺同朋友「分手」時有下面嘅經歷。

#不明不白

失去一段友情總係一件不明不白嘅事，每次都係突然發現唔再享受與對方嘅相處時光，又或者係共處時嘅氣氛不復以往嘅歡樂。但喺你尚未深究原因嘅時候，友誼就已經喺不自覺間流逝。所以喺察覺問題後，一定要同對方開誠佈公咁傾一下。即使解決唔到問題，亦可以好好為呢段友情畫上句號，唔使耿耿於懷。

#後續難堪

不明不白嘅友情破裂就更係為以後嘅碰面添上一份難堪，因為雙方都唔知道到時候應該點樣面對對方。尤其係當兩人擁有相同嘅朋友圈子時，就更加應該注意後續處理，唔好喺對方背後講壞話節外生枝。因為咁做可能會影響到成個團體嘅和諧，令場面再添混亂。

#溝通不足

一段友情嘅消逝絕對唔係一時三刻可以造成，必定係有長時間嘅不滿埋於心底，先會一次爆發，造成兩看相厭嘅遺憾結局。其實好多時就係無同對方清楚明確咁表逹自己嘅喜惡，先至會令友誼走入萬劫不復嘅田地。所以一定要同好友好好咁溝通，理解對方感受先可以為友情保鮮。