隨住科技發達，電子產品變得愈嚟愈普及，唔少港人同時擁有電話、電腦及平板電腦等，雖然生活變得更便利，但就增加患上都市病 —— 乾眼症嘅風險。

奧比斯早前聯同香港眼科學會及香港防盲協會進行一項網上調查，希望了解香港乾眼症嘅情況及主要導致乾眼症嘅風險因素。調查共收集到2,741份有效回覆並進行數據分析。

調查結果顯示，有三成受訪者透過國際臨床使用嘅OSDI©乾眼症指數進行自我測試後，被界定為有嚴重乾眼症，但八成人士未曾就乾眼症求診，顯示市民普遍低估乾眼症對眼睛健康嘅影響。

有約六成受訪者長時間使用電子產品，平均每日使用電子屏幕超過八小時，顯示大多港人都有長期使用電子產品嘅習慣，而每天使用電子屏幕超過八小時嘅人出現嚴重乾眼症狀嘅情況，比起每天使用電子屏幕少過兩小時嘅人多14%。

奧比斯及香港眼科學會呼籲港人正視乾眼的問題，保護眼睛健康，並指出長期使用電子屏幕會導致眨眼次數減少，加速淚水揮發，容易造成眼乾同眼睛疲勞問題，長期而言易導致乾眼症，影響視力。

活動上，奧比斯義務眼科醫生兼香港眼科學會義務秘書李琬微醫生表示乾眼症有年輕化趨勢。「以往較多40歲以上人士會患上乾眼症，但今次調查就顯示出乾眼症有年輕化趨勢，喺18至29歲受訪者中，有40%人自我測試都有嚴重乾眼症嘅問題。」李醫生補充指各個年齡層及性別均有機會受乾眼問題影響，當中女士較大機會有嚴重嘅乾眼症狀。

唔少市民以為乾眼症嘅症狀就只有眼乾，以為自己若有充足淚液就唔無患上乾眼症。不過李醫生指出，其實乾眼症都分咗不同類型，當中除咗有「液水分泌不足型」外，亦有「淚液過度揮發型」及「混合型」，指出有病人因為眼乾，所以經常眨眼，增加淚液，表面上看來淚液充足，但實際上可能已患乾眼症。

調查中顯示，超過四成有乾眼問題（各種程度）嘅受訪者會自行購買眼藥水使用。李醫生表示 唔少人以為眼乾便買眼藥水滴，但其實坊間唔係每一種眼藥水都適合，選擇時應該盡量選用不含防腐劑嘅人造淚水，避免防腐劑引發敏感症狀之餘，亦較適宜長期使用。

最後，李醫生指出一般人都覺得年輕不易有眼睛健康嘅問題，但其實都市人經常玩電話、電腦，乾眼症及各類眼疾均有年輕化嘅趨勢，市民唔好掉以輕心。
 

【四大預防乾眼貼士】

李醫生表示，市民可透過「20-20護眼法則」保護眼睛，即使用電子屏幕，包括電腦、平板電腦及智能手機時，應每20分鐘作20秒休息，另外使用時要注意眨眼，幫助淚水均勻滋潤眼面。

第二，避免過長時間使用隱形眼鏡，建議每天佩戴隱形眼鏡嘅時間唔好超過10小時，每星期最好有一至兩天不要佩戴隱形眼鏡，俾眼睛休息一下。

第三，注意有充足嘅休息、睡眠，及均衡的飲食，此舉能幫助眼睛製造足夠嘅涙液。

第四，如果市民需要長時間喺開啟咗冷氣或暖氣，相對濕度低嘅辦公室工作時，可考慮添置一個小型放濕機，增加室內濕度，減慢淚水揮發，舒緩乾眼不適。