水墨藝術變化萬千，成近年藝術界熱潮，愛好者萬勿錯過！由藝育菁英基金會主辦嘅「全球水墨畫大展」今年載譽歸來，10月24日至11月19日期間，「全球水墨畫大展—教育篇」會喺香港中央圖書館舉行，置身於5,000呎嘅水墨空間之中，感受結合傳統畫功與清新創意嘅當代水墨藝術，展覽免費入場，定會成為一眾文青必訪之地！

展覽特設5大亮點，200幅近8呎嘅巨型畫作將會悉數展出，一睹大師級作品嘅風采；特設「向饒宗頤大師致敬專區」，展出饒大師逾60年嚟嘅不同畫作，其中過半數畫作從未曾喺本港展出，彌足珍貴。

「動‧水墨」多媒體專區展示咗結合科技與傳統藝術嘅21幅水墨動畫，作品早前更遠赴敦煌參加文博會，嶄新手法為水墨藝術帶嚟耳目一新嘅感覺，為大師級作品賦予全新嘅演繹；場內「賞‧水墨」短片區將播放由500幅水墨畫作輯錄成嘅影片，等大家一次過飽覽環球水墨大師美妙絕倫嘅大作。

不能錯過嘅仲有30場「樂‧水墨」藝術節目，網上報名10月19日開始，由水墨名家親自教授嘅水墨工作坊、充滿創意嘅「動‧水墨」水墨動畫工作坊等，入場觀眾可與畫家即席交流，親自創作獨一無二嘅水墨佳作；「尋．水墨」導賞團令公眾細味水墨藝術，感受水墨嘅力量和美感。

市民如果想重溫去年於《全球水墨畫大展》展出的全部500幅水墨佳作，可考慮訂購一書兩冊嘅《全球水墨畫大展作品集》畫冊及《全球水墨畫大展作品集》電子版。

書中收錄《全球水墨畫大展》500幅展品，輔以畫家簡介及作品介紹，令震撼人心嘅畫作得以再次躍然眼前。精美大型畫冊將成為東方藝術歷史上嘅重要文獻，對日後水墨藝術發展影響深遠，係研究學習及欣賞水墨藝術嘅必備珍藏。

今年增設電子版發售，包含一隻USB記憶體，除咗輯錄「全球水墨畫大展」500幅水墨佳作外，更有水墨發展史短片，俾大家更深入了解水墨藝術。市民可以喺inkglobal.org填妥訂購表格或喺展覽會上訂購，全部收益將用作「全球水墨畫大展」持續發展用途。

「全球水墨畫大展—教育篇」公眾開放
日期︰2018年10月24日至 11月19日 （11月5日休館）（展期26天）
時間︰上午10時至晚上8時
*10月24日晚上6時開放
*11月19日開放至晚上4時
地點︰香港中央圖書館地下展覽廳全館