有瘦身經驗嘅人就會明白，有一段時期無論你係幾咁嘅努力減肥，但體重就硬係停滯不下。無錯，今日要講嘅就係令人煩厭嘅樽頸期啦！明明一直好俾心機執行計劃，但係就過咗成個月都無結果…到底點樣先可以有突破呢？

想打破呢個時期就係靠飲食同埋運動啦！瘦身時你會配合運動，一開始嘅時候你會做到要生要死，但一段時間之後，身體就會適應咗個運動強度。同樣嘅運動做起嚟就會慢慢失去初期嘅效果，所以調整運動項目係好重要咖。

你可以以原先做開嘅運動作為基礎，再喺上面加上力量訓練，以一星期做三日跳操為例：
25分鐘跳操+ 20分鐘胸部的力量訓練
25分鐘跳操+20分鐘肩部的力量訓練
25分鐘跳操+ 20分鐘背部的力量訓練
你可以按需要自己進行調整，為身體唔同嘅部位加入力量訓練。記住唔好淨係做單一嘅運動，有氧無氧運動結合一齊做係最好嘅。

而飲食方面就要檢視自己一直以嚟嘅飲食模式啦！節食好容易造成樽頸期，所以呢個方法係唔可取咖。你應該恢復返攝取自己所需嘅預算熱量，再增加運動訓練減磅。另外，你都可以反思下自己嘅食量有無按返體重調整，因為較低嘅體重需要較少嘅熱量去維持身體代謝。

如果飲食同運動都嚴格執行，但體重都係無變化嘅話， 就可以試下調整飲食比例，平時食多啲肉蛋類，食少啲主食。最簡單嘅方法就係每一餐都增加1兩肉減少1兩米飯。