由世界綠色組織主辦、大新銀行全力支持嘅「地球‧敢『動』行」2018,今日假觀塘海濱花園舉行壓軸項目——「地球‧敢『動』禮 暨 嘉年華」。
大會請嚟運房局副局長蘇偉文博士等多位官員及社區領袖見證「大募集‧城市新定向比賽」起步,更邀請嘉賓親身到附近大廈天台,由高點欣賞城市靚景,宣揚步行減碳,身體力行推廣今年活動主題「城市遠足」(Urban Hiking)之餘,交流城市規劃嘅意見,共同為打造香港成綠色「好行城市」而努力。
創綠色足印手機APP 帶動港人環繞地球13周
呢項活動已經踏入第三屆啦,除咗透過一連串活動呼籲大家以步行代替短途車,減少碳排放,對抗氣候變化及實踐健康生活。今年更以「城市遠足」主題,推動大家喺市區內發掘綠色景點及城市靚景,唔使乘搭長途車,就可以輕鬆享受到郊外遠足般嘅感覺。
今年除咗續獲得一直支持環保嘅運輸及房屋局副局長蘇偉文博士應邀出席,仲有香港天文台台長岑智明先生、大新銀行有限公司董事總經理兼行政總裁王祖興先生、大新銀行有限公司執行董事兼零售銀行處主管王美珍小姐、旅「行」達人森美及星級主持人伍家謙現身撐場。
全力支持呢次活動嘅大新銀行董事總經理兼行政總裁王祖興先生表示大新銀行希望藉住今次贊助,鼓勵香港市民、大新銀行同事及本地學生,以步行代替短途車程,減少碳排放,一齊改善未來嘅生活環境。銀行一直支持年輕新一代嘅培育發展,同時不遺餘力支持環境保護。未來,大新銀行將會繼續履行社會企業責任,務求與香港市民一起『同步 更進步』。
唔只官員、商界領袖及名人,市民同樣支持。本組織早喺2016年9月推出「Green WALK HK」手機程式,免費供市民下載,記錄步數及熱量消耗外,更獨創可以計算以步代車後嘅減碳指數,推動市民為環保「行多啲」。
今年更多得大新銀行及其同事支持,淨係該行同事喺短短幾個月內,已踏出逾700萬步,合共減少逾1300公斤碳排放量。現時手機程式已累積咗達3千下載人次,合共步行逾5億5千萬步,相等於行咗約44萬公里,可圍繞地球近13個圈,代表我們成功為地球減少近110公噸碳排放量,等同約8架雙層巴士的重量,成績令人鼓舞!
政府亦要配合 「行多步」
世界綠色組織推出「城市遠足」概念,鼓勵市民自行發掘城市美景及多步行之餘,同時促請政府率先開放政府產業的空中花園,讓公眾有更多休憩綠地。組織行政總裁余遠騁博士指出,高空景觀開揚,遠離馬路空氣亦較清新,尤其不少部門大樓位處工商業區,倘能如啟德郵輪碼頭的園景化平台般開放予公眾使用,定能相得益彰。
實測舊區行人路「好行度」 道路規劃應以行人為本
今年組織實測三條路線嘅「好行度」時發現,雖然政府及起動九龍東等多個部門已進行及計劃不少措施以改善行人路,受舊區規劃所限,三線均尚有進步空間,灣仔路段更因行人路較窄、綠化範圍及指示不足,現時對行人嘅吸引力不足,建議喺更多地區設立類似旅發局為遊客而設嘅景點地圖,鼓勵市民「行多啲」。
余又引述本組織早前調查指過半數受訪者(56%)會因「天氣太熱/太凍/落雨」選乘短途車而唔步行往目的地,但現時不少行人路遮陽擋雨嘅上蓋明顯不足,於未來極端天氣更加頻密下,只會打擊市民步行意慾。本組織促請政府於重建或發展新區時,加入相關建築條件。
另外,香港綠色建築議會綠色建築專家葉頌文重提「綠建社區」概念,社區道路應由以車改為以行人為主導,亦應按行人嘅不同需要而設計不同功能嘅道路,如方便行人來往嘅快捷道路,或以方便居民放鬆嘅悠閒道路。此外,佢指出香港其實不乏「藍與綠」即海景及較大型綠化地方,如鰂魚涌英皇道到柏架山,或牛池灣豐盛街到飛鵝山,經常吸引唔少市民步行前往,十數分鐘路程已從繁華鬧市走進翠綠叢林。證明風景怡人、鄰近市區,加上良好道路設施下,自然能推動市民多步行。
嘉賓公眾齊登高 感受城市遠足樂趣
另一方面為咗呼應今年「城市遠足」主題,大會首次舉辦「大募集‧城市新定向比賽」,獲近千名6歲至73歲人士參與,分別來自家庭、長者、學生、志願機構、企業嘅成員及公眾人士支持。比賽以城市定向模式,協助市民初嘗城市遠足,於城市感受郊外遠足感覺,實行「行遠啲 望多啲」,並將此變成習慣。活動當日,一眾嘉賓更實踐「城市遠足」,齊齊由發現號步行至會場附近一座高廈的天台,欣賞蛻變中嘅東九龍城市靚景。
森美及伍家謙十分贊同大會理念,故兩人已經係第三年擔任「地球‧敢『動』行」大使及主持,更不謀而合地稱步行係自己最愛嘅運動之一,最鐘意喺城市發掘鮮為人知嘅地方,並大方分享自己最愛的香港秘景。同日更設有綠色市集及綠「升」級工作坊及多個市集攤檔,出售天然花草茶及天然肥皂等,吸引一眾市民選看及購買,實踐綠色生活。同日上午亦舉行咗第二屆「瀕危動物扮『野』步行大賽」,近百名小學師生將喺專業設計師協助下發揮創意,設計及製作瀕危動物面具參賽,提高大家對氣候變化而導致瀕危嘅物種關注。