「Pika...pikachu」係依三個月，大木博士帶埋一班小精靈去日本各地嘅THE GUEST cafe&dinner 舉辦期間限定嘅「比卡超．伊貝Cafe」。各位精靈訓練員，準備好你哋嘅精靈球去收服小精靈未？準備好就出發去日本，同小精靈一齊享受大餐啦！

# 比卡超/伊貝 焗飯&布甸

(fukuoka.parco.jp)

兩隻萌爆嘅寵物小精靈，比卡超同伊貝，亦係今次主題Cafe嘅主角，將會出現喺意大利焗飯同布甸上面。兩隻Q到爆嘅「主角」，你又會揀邊隻做你嘅拍檔呢？

# 小精靈主題食品

(fukuoka.parco.jp)

除左比卡超同伊貝之外，其他耳熟能詳嘅小精靈都會出現係主菜、飲品同甜品入面。主菜有啟暴龍拉麵、大岩蛇燉牛肉；甜品有卡比獸芭菲、喵喵奶油泡芙同毒氣丸造型嘅甜品。飲品方面，除左比卡超同伊貝拿鐵外，仲有背背龍啫喱特飲同寶石海星粉紅梳打。唔得啦！再講落去個肚又打鼓㗎啦！

# 限定小精靈主題商品

(fukuoka.parco.jp)

食完寵物小精靈大餐，係咪想帶哂啲寵物小精靈返屋企呢？唔洗擔心，Cafe入面仲有小精靈造型嘅商品賣，等大家帶哂咁多隻小精靈返屋企。除咗有襟章、亞加力匙扣、文件夾等等之外，仲有比卡超同伊貝造型嘅筆盒、Cafe限定嘅T恤、環保袋同馬克杯，等緊你帶哂佢哋返屋企。

有咁多寵物小精靈同你食飯，仲可以帶哂咁多隻小精靈返屋企。各位精靈訓練員，準備好你嘅精靈球去福岡嘅「比卡超．伊貝Cafe」到捉精靈未呀？

札幌  札幌パルコ　4F 2018/10/27~2018/12/25

福岡  福岡パルコ　本館5F 2018/11/2~2018/12/17

池袋  池袋パルコ　本館7F 2018/11/9~2019/1/7

名古屋 名古屋パルコ　西館８F 2018/11/16~2019/1/14

大阪 心斎橋161　2F 2018/11/16~2019/1/29