每個月份，都有佢所代表嘅「季節」，即係花季同節日，好似二月至三月係梅花雨節；三月至四月係櫻花季節等等，又好似四月復活節；十月萬聖節等等。每個「季節」都有佢所代表嘅顏色，好似紅色嘅玫瑰、白色嘅水仙；又好似當我哋講到新年又或者係一啲喜事咁，我哋會諗到紅色；講起落雪會諗起白色。今個年尾到下年年頭，京都嘅「Winter Illumination」同你大膽玩「色」— 顏色同燈飾。

# 唔同嘅月份 唔同嘅顏色

為咗突顯唔同月份所帶出嘅季節感，京都站前嘅街道同京都鐵塔嘅燈光都會染成嗰個月份嘅顏色。每一種顏色，都帶比人一種唔同嘅感覺，亦仿如置身現場感受節日氣氛一樣。

(kyoto-station-building.co.jp)

除咗頭先所講嘅之外，每年11月，係京都紅葉飄落嘅季節，亦係賞楓嘅好時機。京都站前亦都唔放過呢個機會，將街上嘅花草樹木同建築物、甚至係京都塔，都染成紅葉嘅顏色。平日夜晚藍藍紫紫嘅京都塔，都為咗秋天嘅降臨，同楓葉一齊轉成橙紅色，別具風格。

(kyoto-station-building.co.jp)

聖誕節會令你諗起啲乜野呢？我就諗起聖誕樹同聖誕老人啦！聖誕樹，係冬色之中都仍然可以鶴立雞群，係其他樹嘅樹葉已經凋謝到七七八八嘅時候，佢依然保持住綠葉成陰。而聖誕老人，紅衫紅褲嘅打扮就令人諗起紅色！今個十二月，京都繼續同你「玩」色。唔單止係街道上，連京都塔嘅燈光都變成紅中帶綠；綠中帶紅嘅聖誕色彩。

(kyoto-station-building.co.jp)

而係1月，「Winter Illumination」以日出去代表新一年嘅開始。利用太陽升起嘅橙黃色，令成個京都都有新一年、新開始嘅感覺。如果你想去睇日出，但有覺得4、5點係山上等日出有啲吃力，倒不如近近地去京都睇。「Winter Illumination」嘅玩「色」技術，絕對令你好似置身現埸，感受到日出嘅溫暖。

(kyoto-station-building.co.jp)

最後，三月初春，「Winter Illumination」以大地回春為題，將街道染成綠色，就好似青草萌芽咁。而係二月，正正係梅花雨節，亦都係情人節，梅花又好；初戀又好，都係以浪漫得嚟帶點少女心嘅粉紅色代表，就好似京都站前大樓咁，同另一半過浪漫情人節。

# 每日演出

(kyoto-station-building.co.jp)

就咁睇燈「色」當然唔夠啦！活動期間，係Aqua Fountain同京都站前廣場前面都會有分別名為「Aqua Fantasy」同「萌芽初生」嘅演出。「Aqua Fantasy」係由音樂、光同水演出嘅藝術作品。Aqua Fantasy係以音樂混合舞動嘅泉水，利用唔同色彩嘅燈光照射，令泉水染上七彩奪目嘅顏色。而「萌芽初生」，係以鋼琴樂聲，伴隨住街燈七彩顏色嘅變化，令山下有子老師嘅歌曲變得更有格調。係今個冬季，一定要落足眼力細心欣賞！

(kyoto-station-building.co.jp)

京都嘅Winter Illumination，係今個11月至3月同大家大膽玩「色」，我指顏色同燈飾。另外仲有精彩嘅表演，嚟緊去京都嘅朋友一定唔可以錯過！

Winter Illumination
地點：京都站前
日期：2018年11月23日至2019年3月23日 
時間：17:00-24:00