十二月開始，亦代表咗冬天嘅來臨，所以令唔少女士備受困擾嘅手腳冰凍問題又會再次出現。女仔嘅體質本身就偏冷，加上喺夏天嘅時候成日食冰凍嘅野，就會令體內寒氣盛，因而造成手腳冰凍嘅問題。唔想成個冬天都凍冰冰咁過？咁就可以試下用下面嘅方法驅走寒氣啦！

#冬天多做運動
天氣凍嘅時候可以增加自己嘅活動量，出少少汗去令身體調節温。例如快走30分鐘，配合埋雙手擺動，就可以促進血氣流通，令你成個人都暖起嚟。而做運動嘅時候亦都要注意返地點同時間，最好就揀返啲有陽光同埋無咁大風嘅地方進行活動。

#注意下肢保暖
好多女士為咗靚，喺嚴寒下都會着短裙出門，係咁吹風就自然會令下身寒冷。所以喺寒冷嘅日子都係唔好咁貪靚啦，着返條長褲擋風，又或者係加返對絲襪保暖啦！

#用熱水泡腳
喺睡覺之前，可以用熱水浸下隻腳，又或者可以用艾葉或生薑煮水浸腳。咁樣就可以為你去除寒氣，更加容易瞓着啦。但係呢個方法唔係人人都啱用，要注意返自己嘅身體狀況啱唔啱進行浸腳呀！懷孕或月經期中嘅婦女、糖尿病出現神經病變人群、患有各種嚴重出血病嘅人、足部有外傷、水皰、疥瘡、發炎、化膿、水腫及較重嘅靜脈曲張患者、心腦血管疾病者等。以上人士要浸少啲甚至係要避免浸腳。

#多食温熱性食材
手腳冰冷嘅話就應該喺日常飲食中多啲選用温熱性食材，蔬菜類就有紅蘿蔔，菠菜，而堅果類就可以揀核桃仁。另外仲有牛肉羊肉，以及海鮮類食材都可以幫助手腳冰冷嘅人擺脫煩惱。喺計劃食譜嘅時候不妨可以考慮下佢地呀！