H&M很高興宣佈與同為瑞典潮流品牌嘅Eytys攜手合作，推出全新設計系列。Eytys呢個嚟自斯德哥爾摩嘅潮流品牌，向來以簡約嘅厚底鞋款、中性嘅創作理念，以及設計完美嘅基本必備服裝而聞名時裝界。Eytys x H&M系列將會包括為大人而設嘅中性鞋履、服裝及配飾，以及精選童裝款式，全部都係由Eytys與H&M內部團隊合力設計，將會喺2019年1月24日推出，喺H&M全球指定門店及網上商店hm.com正式發售。

Eytys嘅設計方針及整體價值觀，都植根喺數碼時代，而且無拘無束，唔受性別或年齡限制。兩個品牌呢次合作，完全釋放出Eytys基因嘅核心，創作出一套輕便前衛嘅中性鞋履及服裝系列，包括採用皮革、麂皮及棉帆布料製作嘅波鞋、鞋及靴子，配合以棉斜紋布、人造漆皮、尼龍、原始牛仔布等材料製作嘅外套、上衣、長褲及牛仔褲。所有鞋款都係由H&M內部團隊聯同Eytys一起設計，全部採用咗Eytys獨有嘅鞋底，而服裝嘅輪廓則較為寬闊鬆身，不分男女。

蛇皮圖案、人造漆皮、軟麂皮，糅合咗硬質棉及富有玩味嘅圖像，而顏色方面就有琉璃綠、校巴黃、米卡其、深靛藍、黑色及白色。所有款式都可以隨意輕易配搭，適合營造唔同感覺，幫助顧客盡顯個人自信及風格。每對鞋均配有一個特別設計嘅鞋盒，印有瑞典藝術家Zoe Barcza嘅獨特畫作。

Eytys創意總監Max Schiller表示佢地希望透過今次合作，向H&M嘅顧客介紹Eytys嘅設計哲學，以輕便堅實嘅設計為主，實用性蓋過裝飾，而風格就超越咗性別界限。細緻嘅比例係呢套系列嘅重心所在，巧妙地運用咗鬆身嘅輪廓及厚底嘅鞋款，創造出獨特嘅中性輪廓。Eytys嘅意念在於建立適合各種風格嘅『萬能』外型，令人更感完整、更有態度及自信。

H&M男裝設計代理總監Ross Lydon表示佢地好欣賞Eytys自成一格嘅魅力，最初構思與他們合作，係一齊設計鞋履系列，但大家初次開會之後，決定創作全套系列，包括鞋履、服裝及配飾，因為咁樣先可以令顧客真正體驗到Eytys嘅美學及價值觀。透過呢套系列，佢地希望圍繞中性嘅厚底鞋款及細緻設計比例，為顧客提供完整嘅時尚造型。