你習慣一日飲幾多杯水呢？原來飲水唔只對身體好，仲係可以幫手減肥咖！有德國嘅科學家就提出咗「8杯水減肥法」，只要喺一日內按時飲8杯250c.c.嘅水，就可以成功減肥啦！一個月可以輕鬆咁瘦5kg！

第一杯就要喺朝早起身嘅時候飲，因為身體喺一晚過後正值缺水嘅階段，飲暖水就可以幫助代謝。而第二杯就係喺朝早九點飲，因為呢個時間係腸胃排毒嘅時間，飲水可以有效清理腸胃嘅毒素。第三杯就喺上午十一點半飲，因為午飯時間前飲水可以增加飽足感令你中午唔會食太多，同時呢個時段亦係心臟排毒時間，飲水可以促進過程。

第四杯就喺下午一點飲，喺飯後半個鐘頭飲水就可以幫助消化，以免腸胃負擔太大。第五杯就要喺下午三點半飲，下午茶時段肚餓想食野就要靠飲水嚟抑制饑餓感，咁就自然唔會係咁飲珍珠奶茶啦！第六杯就要喺下午五點半飲，因為越近收工時間就會越餓，呢個時候飲杯水就可以打起精神同無咁肚餓。

第七杯要喺夜晚七點鐘飲，因為呢個時間係新陳代謝最頻繁嘅，飲水可以促進血液循環同排毒。而最後一杯就要喺夜晚九點飲，喺瞓之前兩個鐘飲杯水就可以調節血液濃度，亦都可以補足瞓覺時流失嘅水分。

但要注意有三類人係唔啱用呢種方法減肥咖，包括有胃潰瘍，消化不良嘅人士，夜間頻尿嘅人士，以及晚上飲水會喺隔日水腫嘅人都要避免用呢種方式減肥呀！