對於大多數香港人嚟講,緬甸係一個相對陌生嘅地方。旅行嘅意義就係要探索未知嘅地方,所以小編就決定介紹一下呢個咁神秘嘅國度。到底緬甸有咩景點值得各位一去嘅呢?
今次要介紹嘅係位於緬甸中部嘅蒲甘(Bagan),最出名嘅就係當地日出時份嘅景色啦!喺10月至3月底前往當地嘅話,仲可以見到熱氣球徐徐升起嘅壯麗景致。能夠親眼見到的話一定會令人為之讚嘆。
想睇日出就當然係要揾返個絕佳嘅位置啦!瑞山陀佛塔(Shwesandaw Pagoda)就係最好嘅選擇啦!呢度係觀光遊客票選出嘅日出日落最佳觀賞景點。每日嘅清晨5點起就會有遊客聚集喺呢個地方,等待日出及熱氣球升起嘅畫面。
如果唔想平凡地喺地面觀賞日出,你都可以選擇成為空中嘅一員,坐喺熱氣球當中以更接近天空嘅距離欣賞自然美景。
蒲甘除咗以日出吸引旅客前往,亦都以佛塔古都之稱而聞名。當地保留得最為完整,並最具標志性嘅佛寺就係阿南逹寺(Ananda Pagoda),呢座佛寺亦被稱為當地最優美嘅建築,佛塔嘅外牆雕有數千尊佛像,充滿莊嚴之感。而寺嘅四方(東南西北)各有一門,內有一尊高約十米嘅釋迦立佛俯視眾生。
各位不妨喺假期時到訪當地,感受各式各樣佛塔嘅魅力,發掘蒲甘嘅美好。
Tags: Homita去旅行
如果你都想分享你嘅美容、時尚、旅行、運動心得,請將投稿文章連同不多於100字個人簡介同埋近照一張,電郵到: editor@homita.com.hk,文章經小編篩選後更有機會刊登喺我哋FB專頁,一經入選我哋會支付相應稿酬,仲唔快啲來投稿?
Author Information
You May Also Like