草莓控嘅春天又要嚟啦！由於迎嚟咗福岡縣產博多草莓嘅當造時間，位於日本東京嘅新大谷飯店(ホテルニューオータニ 東京)推出咗「あまおうSweetsフェア」(草苺Sweets Fair)活動，至3月31日(日)期間以博多草莓炮製出多逹32種原創甜點以及雞尾酒。

由於今次活動實在有太多款草莓甜食啦，小編只有忍痛精選幾款做介紹。

エクストラスーパーあまおうショートケーキ  ￥3,000
(Extra Super草莓蛋糕) 
呢款蛋糕每日限定10個咖咋！當中用咗8粒博多草莓，而蛋糕部分麵團就用咗酒店嘅「玄米卵」，再加入國產八穀米麥片粉及高級小麥粉製成。加入「和三盆糖」嘅杏仁奶而成嘅生忌廉可以進一步引出草莓嘅鮮味，令你一試就欲罷不能。

スーパーあまおうショートケーキ ￥1,200
(Super草莓蛋糕)
呢款蛋糕嘅麵團係用高級小麥粉以及長崎縣雞蛋製造，而使用九州大牟田産嘅48%脂肪忌廉做出嚟嘅生忌廉入口即溶，與草莓組成完美配搭。

ホテルニューオータニ特製 あまおうパンケーキ ￥2,800 ◇SATSUKI
(新大谷飯店特製 草莓鬆餅)
麵團係用意大利產嘅奶類製品里考塔製成咖，再配以北海道產小麥或J白麥片作底。甜點上綴以扁桃風味嘅忌廉以及鮮紅飽滿嘅草莓，真係好吸引呀！

あまおうパフェ￥2,200　◇SATSUKI
(草莓芭菲)
呢道甜品都好值得一試咖！作品完美地結合甜美嘅草莓以及八丈島娟珊牛奶義式雪糕，而頂端就加咗扁桃精製奶油同埋特制嘅馬克龍，相信大家亦都會愛上呢杯草莓芭菲。