打造安樂窩係大家嘅共通嘅追求。為咗得到完美效果，大多數人都會行遍多間家具店，四處尋覓理想中嘅傢俬飾品。到終於揀到啱心水嘅物品，帶返屋企之後就發現效果不似預期。明明係同一件物品，點解放喺店鋪會比放喺屋企好睇咁多嘅呢？想提升家居質感嘅話就要注意呢幾件事啦！

#定期清理物件
無論家居裝飾得再靚，凌亂嘅空間總係會帶嚟負面感覺，令家居氛圍大受破壞。所以大家要學識斷捨離，將唔再用嘅物件送出或者好好咁收納。培養定期整理嘅習慣係好重要咖，當然最重要嘅就係學會控制自己，唔好過度購物。

#測試光色
燈係家居裝飾不可缺少嘅一部份，但喺買之前記住要測試一下光色呀！因為唔同嘅燈光會呈現出完全唔同嘅氛圍，無論係過黃或過白都會令到空間嘅舒適感大跌。所以各位喺買前要好好咁考慮燈光與空間嘅配合。

#整理電線
電線好多時都係破壞家中氣氛嘅原兇，因為佢地嘅存在相當突兀，會擾亂家居設計嘅統一性。大家不妨利用不同物件去減低佢地帶嚟嘅違和感，例如以地毯覆蓋、用夾子將電線固定，又或者係將電線沿住枱腳固定。

#加入綠色植物
植物喺營造氛圍方面非常有效，佢地可以點綴沉悶嘅家居，為空間帶嚟一絲生氣。除咗可以裝飾家居之外，植物亦對身心有益，能夠為居住者帶嚟正面情緒。學識善用綠色植物絕對可以令屋企變得不一樣！