早排有睇新聞嘅話，都知道明仁天皇將會喺今年嘅四月底退位。喺新天皇登基之後，現有嘅年號「平成」亦都會隨之改變，代表一個時代嘅終結。日本人亦發揮佢地一貫嘅創意，推出以平成最後一日，即係4月30日係為賞味期限嘅薯片。
「湖池屋 平成最後のポテトチップス 濃いめのり塩」嘅價錢連稅為165円，由1月29日起喺LAWSON店舖限定發售。
同平日見到嘅薯片唔同，呢款薯片特別將賞味期限果一格放到極大，強調呢包係平成最後嘅薯片。包裝設計仲特意回顧平成年間別具意義嘅字句，由「柏林圍牆」至記錄溑費稅變化嘅「消費税3％→5％→8％」，仲有「二千日圓紙幣」、「女僕咖啡店」等等嘅字眼。
除咗LAWSON STORE100之外，日本全國嘅LAWSON店都可以買到呢款薯片。大家不妨買返包嚟過下瘾，一路食，一路回想平成年間發生過啲咩值得回憶嘅事情啦！
如果你都想分享你嘅美容、時尚、旅行、運動心得，請將投稿文章連同不多於100字個人簡介同埋近照一張，電郵到： editor@homita.com.hk，文章經小編篩選後更有機會刊登喺我哋FB專頁，一經入選我哋會支付相應稿酬，仲唔快啲來投稿？
Author Information
You May Also Like
