小學，係人生必經階段，大個咗回望過去，可能都會好懷念嗰一個懵懂嘅自己。今日就等小編我帶你哋去90後嘅小學雞世界，睇下一眾90後有乜野小學雞回憶！

#    BB彈

(google圖片)

    90後嘅朋友細個嗰陣最鍾意落公園玩，仲會幫襯公園附近嘅小食亭。除咗野食之外，仲會買BB彈槍，係公園亂搶掃射。唔鍾意射擊嘅，都會比BB彈槍七彩繽紛嘅顏色吸引，將地上面嘅BB彈執返屋企。記得小編細個嗰陣好鍾意同朋友係公園執BB彈，執下執下執到屋企有幾個擺滿BB彈嘅樽。

#    水晶寶寶

(google圖片)

    水晶寶寶吸水會變大，好似一粒粒水珠仔咁，係曾係風靡一時嘅小學雞玩意。其實小編細個都有養過水晶寶寶，拎出街周圍整蠱人。不過水晶寶寶係香港已經無得賣啦，除咗因為惡作劇導致其他人跣親嘅危險之外，更加有專家質疑水晶寶寶會致癌，係香港消聲匿跡。

#    跣地

(google圖片)

    你以前落雨塊地濕晒先會跣呀？錯啦！乾燥都會跣㗎！學校禮堂嘅瓷磚，落雨好天都一樣咁跣，少小學生都會係禮堂模仿溜冰選手，表演各式各樣嘅花式絕技！自細就鍾意溜冰嘅小編，最鍾意就係係禮堂跣地，仲試過因為咁比訓導主任捉去罰企。

#    007

(google圖片)

    唔係國產凌凌漆，而係一個叫007嘅遊戲。「007，入子彈」依句說話相信大家都耳熟能詳。由最初只係得「入子彈」、「射死你」、「保護網」同「反彈網」，到唔知幾時開始多咗嘅「上天堂」、「射地獄」、「炸地球」、「上太空」，甚至係「落N層地獄」等等，都充滿住小學雞嘅回憶！

    作為一個90後，你嘅童年回憶係咪即刻返哂嚟呢？而家科技發達，有邊個唔係做緊低頭族？可能你諗返起以前做小學雞嘅時侯，會覺得自己好低能，但其實做一隻小學雞，先至係人生中做開心嘅事！