花係春天送俾大地嘅情書。三月春意盎然，花兒開遍，為世間編寫愛篇。百花吐艷，邊一種係你嘅心頭好呢 ?

各地民族，憑花寄意。例如意大利嘅斯佩洛花節，人們用鮮花編成各種圖案嘅花毯表達對天主嘅敬意，始見於17世紀梵蒂岡。喺法國，5月1日嘅勞動節亦稱為鈴蘭節，人們互送鈴蘭表示祝福。呢個傳統沿自16世紀，查理九世將代表幸福嘅鈴蘭送俾臣民以示關懷。日本人賞櫻歷史悠久，親友共聚櫻花樹下，席地而坐，把酒賞花。櫻花喺有限嘅時間燦爛盛放，花落時美麗飄散，將生命燃燒到最後一刻嘅特質，展現咗日本嘅武士精神。

古代漢朝，春天有「花朝節」，人們於美麗嘅花海裡吟詩作畫、賞花談情。近年有啲熱愛漢族文化嘅人重辦「花朝節」以慶祝花嘅生日，佢地喺頭上簪花穿上漢服嚟踏春賞花及祭花神。簪花係將花插於頭髮或冠帽上作為裝飾，見於漢朝，到咗宋朝已十分流行，男女都愛簪花，代表喜慶榮華。從古人嘅詩詞及字畫可以看到時人簪花嘅情況。

宋朝有 “四相簪花” 故事。據說四人春日同簪「金纏腰」賞花吟詩。「金纏腰」係罕有嘅芍藥品種，紅花中間有一圈黃花蕊，好似高官身穿紅官服腰纏金腰帶般。呢四個人後來都做咗宰相，引為佳話。科舉中「大登科」嘅新科進士會得到皇帝御賜簪花，係榮耀嘅象徵﹔婚禮中「小登科」嘅新郎頭上簪花係常見習俗。 

喺一年一度嘅春天花期，時代廣場為你帶嚟「迎春簪花」展覽，展出多種嚟自中國、荷蘭及台灣嘅花卉 。另外於展場設有「簪花」拍照區，大眾可以喺電子畫面上選擇喜愛嘅花，簪於頭上拍照留念。

「迎春簪花」展覽
日期：3月8日至3月24日
時間：上午10至晚上10時
地點：香港銅鑼灣時代廣場地面及二樓