芝士平時食就食得多，飲嘅你又試過未? 韓國乳品製造廠南陽乳業主要生產鮮奶、酸奶、乳酪等多款乳製品，近期推出一款注目新品，就係將極邪惡芝士研發成飲品「 怎麼喝芝士 ？(어떻게치즈를마시니)」。呢款新品一推出就大受歡迎，韓妹紛紛影相放上社交媒體打卡，分享飲用感！

呢款飲得到嘅芝士其實係芝士乳酪飲品，以法國卡門貝爾乳酪 Camembert、奶油芝士 Cream Cheese以及意大利拱佐洛拉藍紋乳酪Gorgonzola三種芝士製成，非常邪惡，顏色係淡淡嘅黃色，帶有濃郁芝士香味，飲起嚟帶微甜，芝士控一定會愛上！

更有韓國網民推薦可以將乳酪加入麥片一齊食，呢種食法同樣美味。

這款「怎麼喝芝士？」飲品以橙黃色同白色作為包裝為包裝主色調，樽上印有一塊插住吸管嘅芝士圖案，非常可愛～下排仲有一行細細嘅字寫住：「你吃芝士嗎？我喝芝士！」，設計簡單又易認。

售價：KRW$1,600（約HK$10.5）於韓國各大GS25便利店有售
一支嘅份量都唔少，普通size裝都有一支迷你樽裝酒咁高，最近更推出咗加大size包裝，真係好抵飲～



喺韓國街頭，或者會見到巨大芝士車喺街上行駛，其實係南陽乳業將「怎麼喝芝士？」飲品駛去各個宣傳點，再請大家試飲新品，咁吸睛又可愛嘅芝士車絕對能秒捕捉人眼球。有機會去韓國嘅一定要試試！芝士控快啲入坑啦！