只於日本全家FamilyMart（ファミリーマート）販售嘅「能吃的牧場牛奶（食べる牧場ミルク）」，從2017年秋季上市至今以嚟人氣依舊高企，經常被搶到一杯難求。加入50%新鮮牧場牛奶嘅牛乳雪糕，每一啖都食到極濃奶香，所以受到日本網民大推，而最近佢又再推出兩隻新口味啦～

「能吃的牧場牛奶（食べる牧場ミルク）」牛乳雪糕出自赤城乳業，雪糕加入50%新鮮牧場牛奶，令佢有綿密口感之外，每一啖都食到極濃奶香，品質受到保證，2017秋季一上市就秒引起熱話。杯身上印上小牛插圖，設計簡單又可愛。

「能吃的牧場牛奶（食べる牧場ミルク）」仲會因應季節，推出期間限定口味。一杯售價為198日圓。最近推出新品「能吃的牧場咖啡」（食べる牧場コーヒー），杯中一半係咖啡雪糕，一半係招牌牛乳雪糕，微苦咖啡香同香醇牛奶味非常夾，怕甜或者熱愛咖啡嘅女生絕對可以一試。

另一個新款就係梳乎厘布丁！「たべる牧場ミルク」(能吃的牧場牛奶)第一次推出無雪糕雪糕嘅梳乎厘布丁。雖然無咗招牌牛乳雪糕，但入口即融嘅「梳乎厘布丁」同樣含有50％北海道牛奶，再特別選用白蛋黃雞蛋製作，梳乎厘上仲印有療癒招牌小牛，所以一樣好評如潮。 日本網民指梳乎厘布丁奶味濃，口感滑嫩順口，會令人食完一個再想食多個！

不過除咗食官方推出嘅限定口味外，創意十足嘅日本人點會甘於此。好多日本網民都鍾意喺雪糕上面加上自己鍾意嘅配料，例如水果、糖、朱古力、曲奇等等，創造出屬於自己嘅期間限定口味，再喺ＳＮＳ分享。

每一種配料都同牛乳雪糕意外地夾，想自製「聖代杯」？咁就參考下以下例子！

水果系列

夏天嘅時候推出過50%雙層牛乳草莓雪糕，上層係濃郁牛乳雪糕，下層係帶有果肉嘅草莓雪糕，草莓味同濃郁牛奶味100%地夾，被搶到間間FamilyMart都斷貨。

嫌果肉粒唔夠？擺原粒士多啤梨啦！加上草莓後，原本單調嘅牛奶雪糕瞬間變奢華版。

除咗士多啤梨之外，仲可以擺當季水果。望落直逼店家販售嘅水果聖代！

甜點系列

喺牛奶雪糕上撒上朱古力豆，插上POCKY，再將朱古力塊疊上去。依照個人喜好設計出嚟嘅聖代就完成啦～製成品望落去少女又繽紛，影相打卡一流！

朱古力系列

喺雪糕上淋上朱古力醬，再放滿炙過嘅棉花糖醬裝飾。絕對係可以滿足朱古力控嘅一杯聖代！

ＯＲＥＯ朱古力同牛奶簡直係完美搭配，呢種經典嘅口味絕對要整一杯嚟試～

臨近聖誕節，更推出聖誕限定包裝，招牌小牛換上馴鹿新裝，超級可愛～杯身更加上聖誕花紋作裝飾，喺雪糕上擺放聖誕造型曲奇，節日氣氛滿滿！

有機會去日本嘅話，絕對要喺超商順便買埋想加嘅配料，幫自己做一杯配料滿滿嘅聖代！今次推薦嘅咖啡同梳乎厘布丁兩款新口味都一推出就造成話題，最近去日本玩嘅女生不妨買嚟試試～