無論你係讀緊書定出嚟做緊嘢，有冇試過覺得自己做嘢好冇效率而感到灰心呢？啲嘢好似一直都做唔完，形成咗個惡性循環咁，令人好煩惱啊。如果你最近面對緊呢個問題，不妨試下以下方法，可能可以幫你逃離呢個困境，減低你嘅壓力。

1. 工作時手邊只留相關物品

做嘢嘅時候如果附近擺滿好多物件，例如行事曆、信、報告等，就會容易令你有好大壓力，覺得有好多嘢堆住喺度未做而影響工作效率。雖然你可能真係有一大堆嘢未做，但做每件事嘅時候都應該專注喺一件事上，咁就可以有效率地完成一件又一件事。

2. 自己先主動 set deadline

相信唔少人都做過 deadline fighter，但有時個dealine未必係好緊急，即係遲完成未必有好大後果，就會好易令自己延遲咗完成。如果想自己做嘢有效率，我哋係應該自己提早set個dealine俾自己，除咗可以防止自己遲做完，我哋仲會變咗係主動規劃，唔係一昧地陪合人哋俾你嘅時間，咁樣會令我哋心情都輕鬆啲㗎。

3. 將焦點轉移到自己嘅強項

人總係比較容易睇到自己嘅缺點，然後就會不斷地糾結於如何改善，雖然咁樣未嘗唔係一件好事，但有時就會因為太關注缺點而令自己做嘢冇進展。我哋應該將焦點轉移去自己嘅優點，而且嘗試令優點變得更好，咁樣係有助突破弱點嘅限制，唔會一直停滯不前。

4. 拋開完美主義

完美主義者會成日因為想等一個「完美嘅時機」或者係太專注喺細節度而令自己嘅工作效率變慢，但其實佢哋係需要嘗試唔好太執著喺呢啲部份。有時係咁等完美時機，可能反而令自己錯過好時機，或者等得嚟，好多嘢已經變得唔咁重要，即使喺個唔係咁好嘅時機工作，工作嘅質量依然可以靠其他部份彌補。至少喺關注細節方面，過份執著細節反而會令自己忽略咗大局，而且有時有啲細節都唔係太重要，要求太高其實都冇乜意義㗎～

5. 列出15分鐘工作清單

一份15分鐘工作清單可以點用呢？例如排緊隊，搭緊車咁，我哋就可以嚟實行清單試嘅工作，而且15分鐘嘅工作量唔多，我哋就可以喺不斷完成任務嘅過程中獲得成就感。將一啲冇咁花費時間嘅任務擺落呢個15分鐘工作清單，都有助分擔平日嘅工作。