香港人壓力真係好大，細細個就要學十幾廿樣才能，琴棋書畫唔洗樣樣精，不過樣樣都要參加比賽；等到要考DSE啦又要日讀夜讀，如果想讀大熱科目真係壓力爆煲，有時入唔到自己想入嘅科真係只差一個標點符號；讀到大學以為可以享受青春點知一個唔覺意又要做Deadline Fighter，Final Year又擔心前路坎坷；出黎做野又要服侍啲尊貴客戶、睇老細面色仲要兼顧扮工室政治，加埋每個月嘅水電煤租比家用，真係好多負能量啊！
香港人，放鬆吓啦！每個人都有自己一套放鬆嘅方法，而唔少人都會選擇去郊遊呼吸一下新鮮空氣，今日就同大家整理咗5條超輕鬆郊遊路線，就算平時零運動都可以去感受到香港大自然嘅美，去深呼吸一吓，望住啲山山水水，個人都輕鬆啲架！
郊遊習作 河背水塘遊山看水寫意遊
河背水塘係香港水塘之中最細嘅一個。河背水塘坐落於香港元朗八鄉、錦田河上游，屬於大欖郊野公園嘅一部分，自然環境非常優美。
呢條路線除咗開始嘅時候上坡需要少少體力，其餘時間都非常輕鬆好行，而且沿途有藍天白雲、有芒草，水塘風光又好，放假過黎都唔錯架，唔會耗費太多時間同體力！
郊遊習作 搭地鐵去行南朗山
行南朗山真係超方便，搭地鐵就可以行到，而且非常好行，有大量抖氣位，景色仲好靚，可以睇到深灣、遊艇會同海洋公園，好有香港特色；係度睇日落都好正架！行完仲可以去熟食中心食返碟馳名嘅海南雞飯添！放假訓到晏就先出發都仲得！
橋咀洲係香港聯合國教科文組織世界地質公園景點之一。呢個細又長嘅島嶼1.4億年前形成嘅地質奇觀，如果您想搵個地方hea返一日，搭下船、遊山玩水、吹海風、睇風景，呢度就啱晒你！
呢度仲可以睇到好多小生物，蟹仔、魚仔、螺、珊瑚隨處可見，大家可以影下相，但記住唔好破壞佢地嘅生態啊！
郊遊習作 川龍至荃灣
想睇芒草又未必一定要行上大東山、大帽山嘅，畢竟對於無做開運動嘅朋友黎講無啦啦走去行上高山有時放鬆唔到仲好有負擔，其實搭程小巴由川龍村向下行一樣睇到芒草，仲可以飲埋個茶先開始行，順便又可以去睇下香港傳統宗教文化，輕輕鬆鬆又一日。
呢條路線基本上只有平路同落山，完全係短程中嘅BB班。春暖花開，櫻花季嘅時候行上少少仲有櫻花睇添啊！
郊遊習作 超輕鬆遊藍地水塘
呢條路線可以睇到碧緑嘅水塘，小編去嘅時候其實天氣唔算晴朗，但因為水塘嘅顏色本身都粉粉地，反而覺得好有仙氣，好值得一行架！其實如果你真係只係想睇下風景，唔想點行嘅話，呢條路線就岩晒你，搭的士係燒烤場落直行廿分鐘就到啦！
以上五條路線每一條都係小編同攝哥哥親身去行過，實測係超輕鬆先推薦比大家架！最後提提大家行山要準備充足，量力而行，去之前可以去地圖Check清楚路線陂幅同長度先決定去唔去；最緊要係愛惜香港大自然，自己嘅垃圾自己帶走啊！
其實好多嘢都係一體兩面，係咁煩忙嘅香港其實都有好多好靚嘅風景，絕對唔會比外國渡假聖地差；同樣，係忙碌嘅生活入面，都會有無數小確幸藏匿於平凡之中，等待你去發掘。小編會陸陸續續同大家介紹我眼中嘅小美好，希望你地睇完會親身去感受一吓啦！
如果，你真係連廿分鐘都唔想行，小編都仲有好介紹！記住留意Homita Facebook同網頁更新啦！
