時新漢堡飽已經捲土重來一段時間,恩恩今日終於捉咗攝哥哥去食。恩恩細個嘅時候住係土瓜灣,周不時會行去黃埔游水,時新快餐自然係我記心憶中嘅味道,之前知道佢結業嘅消息真係好唔開心;3月嘅時候二少東係黃埔帶住老夥計重開時新漢堡飽,恩思真係好開心架。
唔知係咪因為新店真係好企理,一入去反而有啲唔慣,點咗餐就可以搵位坐。今次我地就叫咗雙層芝士蛋漢堡($33)同雙層火腿蛋漢堡($33)。雖然比以前貴咗,但見間店靚咗,都值嘅。
漢堡依然同記憶中嘅味道一樣好!一咬落去漢堡會爆帶洋蔥味嘅肉汁,漢堡扒煎得香脆,Local都其實有好食嘅漢堡飽架!我自己就中意食雙層芝士蛋漢堡,係未興拉絲嘅年代佢已經默默拉緊絲架啦!細個反而覺得拉絲無乜特別,單純就係鐘意食佢戈塊薄薄嘅芝士,大個發現原來佢都係微邪惡微拉絲,哈哈!
順帶一提,呢度嘅薯條同炸脾應該都Keep到水準,我地去當日都見唔少人點黎食,不過唯一一個缺點就係,佢實在唔係一間「快餐」啊!唔通拎走咗個「快餐」真係會慢啲?雖然落單嘅時候已經被告知要等,但真係等咗唔止一陣啊!上Facebook睇原來佢地都發現咗呢個問題,努力解決中,真係加油啊!
Tags: Homita為食家
如果你都想分享你嘅美容、時尚、旅行、運動心得,請將投稿文章連同不多於100字個人簡介同埋近照一張,電郵到: editor@homita.com.hk,文章經小編篩選後更有機會刊登喺我哋FB專頁,一經入選我哋會支付相應稿酬,仲唔快啲來投稿?
Author Information
You May Also Like