活化保育相信都係其中一個大家關心嘅議題，因為呢件事關乎我地能否將歷史嘅痕跡保留落嚟，等佢地可以同時代嘅巨輪一齊前進並得以傳承。香港賽馬會(馬會)一直致力保育文物，今次就將三組位處中環核心地帶嘅法定古蹟活化成為大館－古蹟及藝術館，等大家都可以一暏文物當年嘅風采。

咁到底大館係咩呢？「大館」是昔日警務人員和公眾對前警察總部以至整個建築群的簡稱。佢由中區警署建築群——前中區警署、中央 裁判司署和域多利監獄組成，當中包括 16 幢歷史建築物和戶外空間，見證咗本港 170 多年嚟嘅歷史。大館嘅建築面積為 27,900 平方米，入面設有兩個大型戶外空間——檢閱廣場和監獄操場， 以及一個全新興建、位於綜藝館嘅半露天場地。活化後嘅建築群設有多個出入口，可以通往中環各個區域，並設有一條新建行人天橋，連接中環半山嘅自動扶手電梯，非常方便。

中區警署建築群活化計劃由馬會同香港特別行政區政府合作推行， 其中馬會承擔建築群嘅保育同活化工作。計劃包括興建兩幢新建築物，分別係賽馬會藝方－內設美術館及當代藝術空間；同埋賽馬會立方－內設演藝廳用作表演藝術、電影放映及教育活動等，令大館得以活化再用。呢個仲係馬會至今負責嘅最大型文物保育與活化項目。 

喺大館嘅開幕典禮上，葉錫安博士指出活化大館係希望為市民塑造承先啟後、觸手可及嘅文化空間。喺大館，訪客可以認識呢個地方嘅司法，執法歷史，以及與社區嘅各種連繫。另外，葉博士亦期望通過展覽、表演節目、教育同外展活動去培養訪客對藝術嘅欣賞。而行政長官林鄭月娥就表示，大館係香港保育歷史建築嘅閃亮例子，亦係政府喺 2009 年宣佈「保育中環」嘅重要項目，呢個計劃旨在提升中區呢個過百年嘅商業中心到更高嘅台階。

十年磨一劍，經過十年策劃，大館已準備就緒，將會喺6月29號起開放公眾參觀。大家記住下個月去中環回顧一下當年中區警署建築群嘅光輝歳月呀。