熱愛旅遊嘅香港人喺一年內搭飛機嘅次數相當可觀，因此使用嘅燃料數量亦非常龐大。咁你又有無留意過飛機用嘅係咩燃料呢？
國泰航空(國泰)為提升生態效益作出堅定承諾。為咗體現其理念，國泰計劃為其全新嘅空中巴士 A350-1000 機隊採用混合航空生物燃料接收返港。國泰航空仲係全球首家投資喺航空生物燃料製造商嘅航空公司，佢地早喺 2014 年投資於美國 Fulcrum BioEnergy, Inc. (「Fulcrum」)，推行將都市固體廢物轉化為可持續航空生物燃料嘅計劃。
Fulcrum 已經喺今年 5 月於美國內華達州動工興建其第一間有商業規模嘅生物燃料廠房， 預計會喺 2020 年投入服務，到時候每年可以生產超過 10,000,000 加侖嘅生物燃料。國泰航空仲會成為首批使用由該設施生產生物燃料嘅航空公司。
國泰航空喺 2016 年接收首架空中巴士 A350-900 客機抵港嘅航班，佢係當時使用生物燃料飛行航程最長嘅航班。國泰航空目前已經接收 22 架同型號客機，全部都注入咗 10% 生物燃料付運抵港。
喺未來四年，國泰將會陸續接收 20 架同型號嘅技術先進客機。首架國泰 A350-1000 客機將會喺 6 月 19 日由法國圖盧茲嘅空中巴士公司總部出廠返港，另外七架同型號客機亦會喺今年內相繼付運。
點解國泰要大費周章，改為使用生物燃料呢？同傳統航空燃油相比，生物燃料能夠減低生命週期碳排放量達 80%，大大提升環保效益。國泰以生物燃料接收 A350-1000 機隊嘅計劃，亦獲合作夥伴空中巴士公司及道達爾支持。 空中巴士公司新能源主管 Frederic Evchenne 表示將會繼續致力透過 A350-1000 以及使用低碳燃料，支持航空業同空中巴士客戶減少碳足跡。
國泰航空行政總裁何杲就表示國泰一直積極推行多項措施，以減低溫室氣體排放帶嚟嘅影響。佢地亦致力落實由 2020 年起碳中和增長嘅目標。為咗達成目標，國泰以採用生物燃料作為一項關鍵策略，佢地亦繼續支持生物燃料嘅開發同應用，期望令呢款燃料可以更快成為日常商業應用嘅燃料。
大家喺計劃旅行嘅時候，不妨留意下自己所選用嘅航空公司係用緊咩燃料。即使係外遊亦可以為環保盡一分綿力。
