十月上映嘅《星夢情深》係一部相當特別嘅電影。獨特地方在於佢係改篇自1937年嘅一部同名電影，而且今次係第二次翻拍啦，對上一次已經係1976年嘅事。

《星夢情深》(A Star is Born)由四度榮獲奧斯卡提名嘅畢列谷巴(Bradley Cooper)同埋曾獲提名奧斯卡最佳原創歌曲、屢獲殊榮嘅樂壇天后兼金球視后Lady Gaga主演，呢次係Lady Gaga首部擔正女主角嘅劇情長片，亦都係畢列谷巴首部導演作品，真係令人好期待呀。

其他參演《星夢情深》嘅演員仲包括《情迷藍茉莉》安德魯戴斯基利(Andrew Dice Clay)、《網上情緣》戴夫查普爾(Dave Chappelle)及《寡佬飛行日記》森艾略特(Sam Elliott)。唔知呢個組合會為呢個悲傷嘅愛情故事帶嚟啲咩驚喜呢？

故事講述由畢列谷巴飾演嘅資深音樂人Jackson Maine發掘咗Ally (Lady Gaga 飾)，並與佢墮入愛河。Ally正喺放棄星夢嘅邊緣，係Jackson令佢再次嘗試踏上舞台。偏偏喺Ally開始走紅嘅時候，因為Jackson嘅心魔而令佢地漸行漸遠……

Lady Gaga除咗飾演Ally之外，曾以〈Til It Happens to You〉獲得奧斯卡最佳原創歌曲獎提名嘅佢，亦為電影而同畢列谷巴、Lukas Nelson、Jason Isbell及Mark Ronson合作，創作咗多首原創歌曲，並喺片場進行現場錄音，相信今次亦會為我地帶嚟令人驚豔嘅作品。

《星夢情深》由華納兄弟影片公司、Live Nation Productions、Metro Goldwyn Mayer Pictures聯合呈獻，華納兄弟影片公司發行，將會喺10月4日於香港上映。到時大家記住要入場，一齊回味呢個古舊嘅悲情故事。