四年一度嘅世界盃將會喺 6月14日於俄羅斯揭開戰幔，掀起全城狂熱！約親友一齊睇波聚會當然係好事，但有唔少人喺睇波之餘仲會賭波，咁就唔多好啦。

為咗令公眾更了解賭博所衍生嘅問題同避免沉迷賭博，由平和基金及民政事務局聯合主辦、香港警務處協辦嘅｢睇波不賭波推廣計劃｣，將會喺本月舉辦一連串嘅大型抗賭波推廣活動。希望可以透過精彩及多元化嘅節目，以及輕鬆嘅手法等大眾認識沉迷賭博嘅禍害。

打頭陣嘅活動係由平和基金、民政事務局與香港警務處合辦，於6月14及23日喺港島及九龍熱門酒吧區(中環蘭桂坊，灣仔駱克道，尖沙咀諾士佛臺及旺角通菜街)舉行「酒吧外展宣傳活動」。
到時除咗會向酒吧顧客派發傳單同紀念品之外，｢警訊御用演員｣－吳良榮(堅哥)及｢警訊之花｣－馬溱禧(Heily Ma) 亦會合力演出抗賭迷你劇，宣揚唔賭波嘅信息。

緊接住嘅係與東華三院平和坊合辦，喺6月16日於香港文化中心露天廣場舉行嘅重點活動－「球‧藝嘉年華」。活動內容非常豐富，包括樂隊Dear Jane及Yellow唱歌助慶、以不賭波為題嘅話劇表演、舞蹈及足球表演等。

場內將會展出早前｢創意塗鴉‧反賭迷思｣塗鴉比賽嘅得獎作品，仲設有一幅長12米嘅創意塗鴉牆俾市民參與即場創作。此外，場內設有十幾個輕鬆、富趣味嘅遊戲攤位，以互動形式讓大眾認識沉迷賭博嘅問題同禍害，並喚起大家對呢個問題嘅關注。

另外，為咗向中小學學生及社區人士作重點抗賭教育，由6月開始，平和基金贊助嘅流動宣傳車「平和號 - 抗賭巡邏艦」將會到訪全港逾百間學校及三十多個地方，包括高危青少年社區。

「平和號」內設有創新遊戲及各種活動，包括「不賭艦橋」多媒體遊戲、密室逃脫遊戲等及防賭資訊，幫助青少年建立健康生活模式。

抗賭活動唔單只喺6月進行，喺7月嘅時候同樣會有活動去宣傳「踢波不賭波」嘅信息。

喺7月2日嘅時候將會喺將軍澳運動場舉行「足」出世界佳績  千人齊破健力士。呢個活動係以刷新健力士世界紀錄為目標，届時將會組織逾千人進行足球活動。

喺7月14日仲會於觀塘遊樂場嘅七人足球場舉行足球比賽。呢場賽事與車路士足球學校(香港)合辦，會由4支青少年精英隊進行四角賽，等公眾領略運動嘅樂趣。

大家記住睇波唔賭波，千祈唔好倒錢落海呀！