世界盃盛事就嚟開始啦,想感受熾熱嘅賽事氣氛就梗係要同朋友一齊落酒吧睇波啦。今次就等我推介一間酒吧俾大家,咁就可以食住小食,嘆住啤酒睇球賽啦。
銅鑼灣耀華街有酒吧街之稱,Ruggers就係呢條街上嘅其中一間酒吧。呢條街上有咁多間酒吧,點解淨係介紹呢間呢?因為呢間係耀華街上唯一一間有得睇世界盃嘅酒吧。
世界盃期間有多隊嚟自不同國家嘅球隊進行比賽,酒吧就推出咗嚟自不同產地嘅啤酒去對應各個出賽國家。
Van Diest Fruli嘅產地係比利時,酒精濃度為4.1%。佢係士多啤梨口味,相當易入口。女士們就可以點呢一杯嚟品嘗啦。
Grimbergen亦係嚟自比利時嘅啤酒,酒精濃度為6.7%。呢一款係Blonde,飲起嚟嘅時候有淡淡香氣。
而Old Speckled Hen就係嚟自英國嘅啤酒,酒精濃度為5.2%。酒中帶有濃厚嘅麥芽味道,相信會令你一試就愛上。
Little Creatures係一款產地為澳洲,酒精濃度為5.2%。佢係一種愛爾淡啤酒。
Maisel’s Weisse嘅產地係德國,佢嘅酒精濃度有5.1%。呢款係小麥啤酒嚟咖。
睇波就當然要配上可口小食啦。
鐘意芝士嘅你絕對唔可以錯過呢款芝士薯條呀,佢肯定會令你一試就欲罷不能。
小食又點少得雞翼呢?呢度有提供單骨雞翼,分別有椒鹽同辣味兩種俾你選擇。兩款都一樣係咁香口呀!
另外,德國香腸拼盤配薯條都係一個唔錯嘅選擇嚟,配埋啤酒真係無得頂呀。
仲諗緊去邊睇世界盃嘅話,不妨約埋朋友去Ruggers呀。佢一定可以提供一個舒適嘅環境俾你地享受球賽,令你地盡興而歸。
Tags: homita小出走
如果你都想分享你嘅美容、時尚、旅行、運動心得,請將投稿文章連同不多於100字個人簡介同埋近照一張,電郵到: editor@homita.com.hk,文章經小編篩選後更有機會刊登喺我哋FB專頁,一經入選我哋會支付相應稿酬,仲唔快啲來投稿?
Author Information
You May Also Like