大家仲記唔記得喺2016年上映嘅《詭屋驚凶實錄2》當中令人頭皮發麻嘅詭修女呢？佢嘅獨立電影終於要推出啦，相信唔少影迷都已經期待咗好耐啦！

賣座驚慄片《詭屋驚凶實錄》系列導演、恐怖片王溫子仁(James Wan)打造又一恐怖icon《詭修女》(The Nun)。電影由《聖魘》哥雲哈迪(Corin Hardy)導演，溫子仁及《詭屋驚凶實錄》系列彼德沙弗朗(Peter Safran)監製。

一個隱居喺羅馬尼亞修道院嘅年輕修女自殺身亡，梵蒂岡教廷因而委派一個曾有靈異經歷嘅神父，以及一個即將發誓終身修道嘅見習修女到當地調查事件。佢地發現咗修道院嘅邪惡秘密，不單令生命受到威脅，連佢地嘅信仰同靈魂都面臨考驗。兩人合力對抗化身成詭異修女嘅邪靈力量，令修道院成為人與邪靈間嘅恐怖戰場。

《詭修女》由《冰天血地8惡人》金像提名男星迪文畢治爾(Demian Bichir)飾演Burke神父，電視劇《美國怪談》泰莎法蜜嘉(Taissa Farmiga)飾演Irene修女、《烈女本色》祖納斯布洛奇(Jonas Bloquet)飾演村民Frenchie，電視劇《權力遊戲》莎樂荷普(Charlotte Hope)飾演住喺修道院嘅Victoria修女，《爸不得妳快樂》英格麗比素(Ingrid Bisu)飾演Oana修女，而邦妮亞朗絲(Bonnie Aarons)就會再度扮演詭異修女。

《詭修女》由New Line Cinema貢獻，Atomic Monster / Safran Company出品，華納兄弟影片公司發行，將會喺2018年9月20日驚嚇現身香港大銀幕。

今個九月約埋朋友一齊入場睇《詭修女》，再次感受俾佢嚇到魂飛魄散嘅滋味啦！