不經不覺,就已經嚟到一年嘅中段。各位期待已久嘅夏季終於來臨啦!你地計劃好要去邊度玩未呢?唔少人都會想係旅程期間同平日少見嘅動物接觸,其中一個熱門嘅選擇就係同鹿玩耍。
講到鹿,相信日本奈良會即刻喺你嘅腦海中浮現,但想睇鹿就當然唔只一個地方啦,台灣都有鹿睇咖!
馬祖大坵島就係一個梅花鹿島,上面野生放養約150隻以上梅花鹿。到底啲鹿最初係點嚟到呢個島上嘅呢?喺3、40年前,馬祖農業改良場將飼養嘅數十頭梅花鹿野放到當時仲係無人島嘅大坵島。當中有啲鹿游咗返北竿,有啲就喺大坵島落地生根,令島上鹿隻嘅數量可以發展到而家嘅規模。
雖然梅花鹿性情温馴,但因為佢地始終係野放動物,所以大家喺同鹿隻親近時亦都要注意安全呀。
島上除咗可以睇鹿,仲可以睇風景咖。大坵島環海,當然就唔少得美麗嘅海景啦,幸運嘅話仲有機會見到海上藍眼淚奇景。而且島上景致迷人,係一個睇日落日出嘅好地方。由於無光害污染,當地晚上仲可以睇到滿天星斗。如果你想體驗與梅花鹿共度一夜嘅話,就可以喺大坵島生態民宿留宿,盡情體驗大自然。
大坵島只會喺四月至十月份開放,並且要提前預約交通前往。想去嘅話就要可以登上http://www.5657.com.tw/dahchi/p04.htm瀏覽詳情啦!今個夏天一於就去台灣馬祖睇鹿啦!
Tags: homita小出走
如果你都想分享你嘅美容、時尚、旅行、運動心得,請將投稿文章連同不多於100字個人簡介同埋近照一張,電郵到: editor@homita.com.hk,文章經小編篩選後更有機會刊登喺我哋FB專頁,一經入選我哋會支付相應稿酬,仲唔快啲來投稿?
Author Information
You May Also Like