上次同大家介紹咗南山區食玩拍一日遊，今次就同大家介紹一下福田區嘅一日行程題案啦！今次會有更加多影相位，大家記住要扮靚靚先好去啊！
今次主要係會同大家去2間商場，第一間就係呢間深業上城，唔知大家有冇聽過Muji Hotel呢？全球第一間Muji Hotel就係位於深業上城，真係玩到唔想走係度住返晚都仲得啊！
深業上城係2018年新開嘅商場，據講入面會有超過300個品牌架！不過目前都未開晒，所以我地黎主要都係為咗打卡影相。第一個影相位就係3樓嘅Loft小鎮，呢度嘅牆身色彩鮮艷，好岩影相。除咗企係牆前影相，係街道上面影都係一個好選擇。
第二個影相位呢就係呢個小鎮入面嘅告白牆。粉紅色一格格由淺變深，上面仲有Will you marry me嘅字句，不過想影晒最好就帶個廣角鏡，小編實測iPhone要企到貼住對面牆都影唔晒。
仲有就係無印良品旗艦店，係香港大家行無印都唔會想影相，但呢間旗艦店好大，亦都有唔少影相位，吸引唔少「網紅」黎影相。
深業上城除咗多打卡位，仲有好野食。之前我地就去過呢度嘅奈雪之茶，今次我地就去Loft小鎮嘅喜茶飲最近好受追捧嘅波波奶茶。
其實喜茶之前都出過布蕾珍珠奶茶，今次係升級回歸，除咗表面會用火槍噴烤，仲用咗黑糖珍珠！黑糖珍珠軟糯有彈性，唔怪得咁多人都黎飲啦！今次一共有兩款口味，分別係布蕾波波茶和奧利奧波波茶，一杯盛惠19大元(係喜茶入面算平)。
其實2杯都幾好飲，不過小編就偏愛奧利奧波波茶少少甜，口感比較豐富，本身oreo同珍珠都幾甜，叫少甜/少少甜會冇咁漏。
係Loft小鎮仲有大名鼎鼎嘅京盛宇，除咗最出名嘅現泡好茶，佢地仲同微熱山丘合作，係度仲可以飲到佢地嘅菠蘿汁同食到鳳梨酥架！
Photo via winshang.com
photo via sohu.com
photo via sohu.com
Photo via prottea
今次我地仲見到一間叫K.STRAWBERRY嘅餐廳，入面有好多打卡位，上網見到有好多網紅都去咗影相，有機會一定要黎試吓！佢嘅食物賣相都好好，據講佢地嘅梳乎厘好高質架！
photo via ctrip
另外小編私心推薦大家去行下佢地嘅超市ole，小編係一個好鐘意行超市嘅人，呢度嘅超市唔止大又靚，仲不時會有網紅食物，例如ole就有大熱豆乳盒子，有興趣記住黎行下啊！除此之外呢度其實都有啲鋪頭行下，食完野行下消化下又再去飲個咖啡，然後再去食食食，正啊！
然後第二間商場就係卓悦intown，如果話深業上城係走elegant路線，卓越intown呢邊嘅店舖就比較個性鮮明。呢度有超多美食餐廳，間間都精心佈置，例如Poke M、SOI22、惠比壽橫丁同潤園四季椰子雞等等都好有自己嘅風格，仲要間間都好好食。亦都有大家喜愛嘅喜茶，仲有面包賣架，不過呢間喜茶嘅人龍就有一點點太長，小編就唔排啦。
Photo via sohu
除此之外仲有為打卡而設嘅Cafe，就好似貨櫃外表嘅Aroma Coffee、燕遇同出晒名嘅Dollshub。
Photo via 檸檬美食
燕遇唔算好出名，小編黎之前都冇聽過有人係度打卡，但店內裝修非常之靚，淺色裝橫加上大量綠色植物，仲有好多書，大家可以係度扮下文青，睇黎遲早都會成為網紅店。
小編叫咗Frappe，個人覺得太甜啦，記住叫少甜！
然後就係Dollshub，係燕遇落一層，行到最入嘅角落就係啦。呢度除咗一排排嘅夾公仔機、仲有波波池，基本上成間店都係打卡位，最低消費每人一杯飲品，小編建議大家真係叫杯野就算，商場入面實在太多比佢好食嘅食物，留返個肚仲開心。
至於夾唔夾公仔...其實都有人成功嘅，小編做過Research，大約有1/10成功夾到公仔，多數都用咗60蚊以上去夾先夾到，但我就覺得個夾真係好鬆，可能要動動小腦子先會成功。
今次我地嘅介紹就去到呢度！有機會再同大家去第二度玩啦！
