王家衛執導嘅電影《阿飛正傳》幾咁經典相信都唔洗我再多講,寰亞電影近日公佈,呢部電影於6月25號首次喺內地院線公映,並通過全國藝術電影放映聯盟專線同全國觀眾見面!未曾喺戲院內睇過部戲嘅觀眾們,就可以一嚐喺大銀幕下觀賞呢部經典電影嘅震撼感受啦!
電影當年於 1990 年 6 月 25 日上映,並由張國榮、張曼玉、劉嘉玲、劉德華、張學友主演,梁朝偉亦有客串演出。事隔 28 年終於安排喺全中國公映,王家衛導演對此表示無腳鳥還在飛。
當年憑電影提名女主角嘅劉嘉玲亦希望觀眾入場觀看。佢認為電影嘅故事情節及畫面美術都相當經典,連佢自己都睇過呢部電影好多次。電影將喺各大城市合共超過 2500 間戲院內重映,各城市嘅觀眾都可以把握機會入戲院觀賞。
電影以六十年代嘅香港作為時代背景,講述一位不羈小子到處留情嘅人生,當中蘊含大量經典對白,「無腳鳥」自此更成為經典之最。對於當時踏入九十年代嘅香港嚟講,可以拍出藝術成份如此高嘅佳作令全城震驚,更為香港影壇帶嚟前所未有嘅創新電影風格。
其後電影喺 1991 年嘅第十屆香港電影金像獎入圍 9 項提名,當中更榮獲五項大獎,包括最佳電影、最佳導演、最佳男主角、最佳攝影及最佳美術指導,風頭一時無兩。
導演及一眾演員自此亦聲名大噪,影片質素實屬國際級高水準,令人震驚。而王家衛、 杜可風、張叔平此後更合作無間,製作出不少令人醉生夢死為之癡迷嘅電影,所有影癡都對王家衛導演嘅作品趨之若鶩。
而家電影竟然可以喺大銀幕上重映,俾老戲迷重溫之餘, 仲可以為新一代影迷帶嚟永恆經典的作品。時至今日,影片依然不落俗套。觀眾要好好把握呢個難能可貴嘅機會,抓緊時間入場觀看呀。