同朋友去到旺角鬧市行街係唔少女士嘅指定動作，行到咁上下，就當然會想揾個地方坐低食野同傾計。位於朗晴坊嘅茶屋町居食屋環境清雅舒適，食客可以暫時遠離鬧市嘅煩囂，享受寧靜嘅時光。想同閨蜜聚會嘅話，揀呢間餐廳就無錯啦！

嚟到夏天，消暑嘅冰凍飲品同甜食就當然係缺一不可，茶屋町嘅高質料理就當然可以滿足你地嘅口腹之欲啦！

Kirin Ichiban Frozen beer $88
旺角區係得喺茶屋町先有賣Frozen beer咖咋！Frozen beer將啤酒做成零下5度嘅幼滑泡沬，令冰凍時間得以延長。炎熱嘅日子飲一大啖Frozen beer絕對係無與倫比嘅享受，茶屋町一共提供咗五款口味嘅Frozen beer，包括熱情果，黑啤，西柚，原味同埋綠茶。

西柚Frozen beer 

喺最底嘅就係Kirin啤酒，當中加入咗西柚嘅糖漿，令成個啤酒都充滿咗西柚嘅味道，而最上嘅沙冰就為啤酒打造出入口幼滑質感。大家喺飲嘅時候要放下儀態，只有豪邁咁大啖飲，先可以一次過品嚐到呢款啤酒嘅多重口感咖。

竹林 $78

呢款飲品驟眼望落去就俾人一種熱帶風情嘅感覺。呢款飲品係以梅酒，法國桑子甜酒及蘇打製成，喺底部呈現出嘅啡色令人聯想起泥土，而旁邊散發迷人香氣嘅迷迭香就好似一支支竹咁插喺泥土，因而有竹林呢個名。呢款酒味道偏甜，相當容易入口，所以係好啱女士們飲用咖！

茶屋町特別喺夏天推出咗幾款新嘅甜品，喺製作時100%選用日本直送嘅無糖豆乳，等女士們唔洗擔心發胖，可以開懷大食。點以下任何一款甜品仲會送上一杯餐飲咖！

夏之戀人 $38

呢款甜品用咗好多嘅時令水果製成，健康之餘仲帶嚟夏日氣氛。喺底層就有由餐廳自己打出嚟嘅忌廉，中間夾雜住香脆嘅可可米，為綿滑嘅忌廉添上新意。再配搭新鮮水果一齊食簡直令人停唔到口呀！

十勝紅豆脆脆 $38

呢款甜品選用嘅紅豆嚟自日本北海道，呢種頂級紅豆嘅豆味濃郁，而且清甜可口。底層同樣有係由餐廳打出嚟嘅忌廉，而擺放係雪糕上嘅就係手工曲奇，同樣心思十足。

戀之火辣辣 $48

呢款甜品以鐡板嘅形式呈上，造型相當獨特。放置喺中心嘅蜂蜜蛋糕上綴以一球伯爵茶味雪糕，而圍繞佢地嘅就係一堆熱辣辣嘅棉花糖啦！棉花糖仲做到拉絲效果，連埋雪糕一齊食嘅話就會一啖熱，一啖凍，好似戀情一樣令人捉摸不透，同樣亦驚喜十足！

茶屋町除咗有室內嘅座位，仲設有戶外座位。晚上喺燈飾嘅照映下用餐別有一番風味，亦極具情調。今個夏日一於約埋朋友去到茶屋町，享受多款令人驚豔嘅飲品及甜食，一齊渡過愉快輕鬆嘅時光啦！

茶屋町居食屋
地址:旺角砵蘭街215號朗晴坊4樓 (2321 5131)