喜愛睇喜劇嘅影迷們又多咗一部不容錯過嘅電影啦！《Juno少女孕記》(Juno) 黃金創作組合：導演積遜懷文(Jason Reitman)及編劇戴雅寶高迪(Diablo Cody)，繼《中女翻叮日記》(Young Adult) 後，再次與金像影后查理絲花朗 (Charlize Theron) 合作，炮製最新喜劇《論盡爆煲媽咪》(Tully)！

當年《Juno少女孕記》熱爆全球，叫好叫座，仲為戴雅寶高迪奪得奧斯卡「最佳原創劇本」殊榮，而導演積遜懷文亦憑此片及《寡佬飛行日記》(Up in the Air) 兩度提名奧斯卡「最佳導演」，成績驕人。

而近年狀態大勇嘅查理絲花朗，接連拍下《末日先鋒：戰甲飛車》(Mad Max: Fury Road)、《獵神：魔雪叛變》(The Huntsman : Winter's War) 等多部重磅鉅製後，今次以其精湛演技回歸精品喜劇，佢仲為此片增肥35磅，搖身一變成為3子之母，完美演繹阿媽照顧小朋友嘅辛酸無助。

瑪露 (查理絲花朗 飾) 一直獨力湊大兩隻化骨龍，並身兼所有家務事，老公就日日只顧返工同打機。但老三出世後，瑪露終於接近崩潰邊緣，就算討厭外人插手家事，今次都要搵救星，聘請夜間褓姆桃莉。瑪露慢慢地與呢個充滿活力、自由奔放嘅女孩建立出獨特友誼，亦搵返自己嘅生活，喚醒了潛藏心底嘅另一面…點知，原來桃莉竟然同樣一直隱藏緊自己嘅真面目？

想知故事點樣發展？咁就記住8月30號齊齊入場一探究竟啦！