大家仲記唔記得17年前風靡亞洲嘅經典偶像劇《流星花園》呢？全球首屈一指嘅串流娛樂平台 Netflix 宣布推出《流星花園 2018 》華語偶像劇同時公布全新預告片。
 
《流星花園 2018 》由偶像劇之母柴智屏一手包辦編導製，加上金牌監製崔震東以及當年參與製作嘅原班人馬，帶來全新世代嘅杉菜與F4，仲有徐熙娣、郭采潔、庾澄慶等巨星參與演出，獨家重現十七年前轟動亞洲嘅經典之作。《流星花園 2018 》會喺 7 月 13 日香港晚間 10 點喺 Netflix 獨家首播，一次上架 6 集，之後逢星期五每次更新 6 集。

柴智屏表示流星花園喺2001年首播時，曾經喺17個國家地區播映，喺全亞洲掀起一波偶像劇熱潮，當時無論係年青人定係打工仔女，每日追看流星花園幾乎係例行公事。17年後嘅今日，佢地為『00後』觀眾重塑故事，唔理係故事情節、台詞、甚或觀賞平台都因時制宜，佢相信所有年齡層嘅觀眾都可以一齊享受呢部校園戀愛嘅經典之作。

今次與Netflix合作，嚟自超過190個國家嘅觀眾將會可以一同觀賞《流星花園2018》，呢個紀錄可以話係前所未有，仲創下當今華語偶像劇嘅新紀錄。柴智屏希望，全球觀眾都可以感受呢部劇集嘅獨特魅力。

擔任《流星花園 2018 》嘅總監製崔震東，曾與偶像劇之母柴智屏攜手創造出許多華語劇集嘅經典，呢次合作重現經典，自然係萬眾矚目，《流星花園 2018 》堪稱係今年最受觀眾注目嘅「神劇」。

崔震東表示一開始決定要重拍經典，壓力的確好大。喺尋求合作與資源整合上都係困難重重，慶幸佢地過去一直堅持製作佳品，亦有賴觀眾口碑，而家再加上Netfilx 嘅加持，佢相信《流星花園2018》未播出就已經大獲全勝！

Netflix內容採購副總裁Rob Roy 補充指Netflix致力為全球會員喺世界各地發掘受觀眾歡迎嘅故事，流星花園就係不容錯過嘅亞洲偶像劇經典。全新嘅流星花園 2018係由充滿創意與偶像劇獨眼眼光嘅柴智屏團隊所創作，全球會員無論係老粉絲定新觀眾，都可以享受呢部經典重拍。

《流星花園 2018 》由「台灣偶像劇之母」柴智屏擔任編劇、導演與監製，打造全新F4組合，由王鶴棣飾演「道明寺」、官鴻飾演「花澤類」、梁靖康飾演「西門彥」、吳希澤飾演「馮美作」，顏值爆棚，令人期待。

兩位靈魂女角杉菜與道明莊，分別由因《致我們單純的小美好》走紅嘅沈月飾演董杉菜，「小S」徐熙娣飾演道明寺姐姐「道明莊」，台灣女歌手郭采潔與「哈林」庾澄慶亦客串傾情演出，以年青人嘅語言重塑這部校園愛情經典。

2001年，柴智屏改編日本漫畫《花樣男子》，拍攝史上第一套亞洲《流星花園》偶像劇，劇集不僅空前成功，仲掀起之後十年嘅亞洲偶像劇熱潮。呢部劇集仲以膾炙人口嘅日韓改編作品，穩坐亞洲偶像劇嘅經典寶座。

今晚記住坐定睇流星花園嘅首播，重温當年嘅經典呀！